શરૂઆતમાં

હું પણ ફસાઈ છું જ,

એવું લાગતું શરૂઆતમાં,

મારા વિચારોનુંય ટોળું,

ભાગતું શરૂઆતમાં.

છલકાય મારું સ્મિત ને,

એકાંતમાં એ ઝળહળે,

અંદર ખુણે વંટોળ સમ,

નુર નાચતું શરૂઆતમાં.

દિવસે વળી ખુલ્લા નયનથી,

જોઉ ને રાતે પછી,

દેખાય આંખો બંધ,

પણ દિલ જાગતું શરૂઆતમાં.

જોઈ નયન શરમાય જાતાં,

ને વળી નમતા એ પણ,

એને ફરી એકીટસે દિલ,

તાકતું શરૂઆતમાં.

બસ આમ વારંવાર,

કોઇક ભીડમાં મળતું મને,

જોવા ફરી એની ઝલક,

દિલ રાચતું શરૂઆતમાં.

સમજું બધું મારું હુ,

પણ ઘટતું જ રે'તુ કેટલુક,

આ માલિકી દિલની ય,

કોઇક રાખતું શરૂઆતમાં.