પરવાનગી
પરવાનગી
વરસાદનાં છાંટા જ્યારે પાણી ભરેલા ખાબોચિયામાં પડે છે અને ખાબોચિયામાં જેમ વમળ રચાય છે,
એમ,
હું પણ તારા પ્રેમમાં પડી આપણાં પ્રેમનું એક વમળ રચવા માગું છું !
શું તું મને પરવાનગી આપીશ ?
સૂર્યનાં કિરણો જેમ શૂન્યાવકાશને પણ ઓળંગી પૃથ્વી સુધી પહોંચે છે, ધરતી પર અજવાળું ફેલાવવા માટે,
એમ,
હું પણ દુનિયાનાં બધાં જ બંધનોને ઓળંગી, મારા પ્રેમની જ્યોતથી તારા હૃદયમાં અજવાળું ફેલાવવા માગું છું !
શું તું મને પરવાનગી આપીશ ?
શ્વેત પ્રકાશ જેમ સાત રંગોનું મેઘધનુષ્ય રચવા પોતે વિભાજિત થઈ જાય છે,
એમ,
હું પણ તારા જીવનમાં ખુશીઓનું મેઘધનુષ્ય રચવા વિભાજિત થવા માગું છું !
શું તું મને પરવાનગી આપીશ ?
ઝાકળનાં બિંદુઓ જેમ હવાનો ત્યાગ કરી પર્ણ સાથે જોડાય છે, કુદરતની સુંદરતામાં વધારો કરવા,
એમ,
હું પણ મારા પરિવારને છોડી તારા પરિવાર સાથે જોડાવા માગું છું, તારા સંસારની શોભા વધારવા !
શું તું મને પરવાનગી આપીશ ?