🦋કાગળ અને કલમ🌹

સાવ અચાનક, શી ખબર ભૈ કેમ થઈ ગયો !

કાગળને કલમની સાથે પ્રેમ થઈ ગયો.

કલમ લખે ટહુકો, ને કોયલ ચીતરે કાગળ,

કલમ લખે ગગન, તો કાગળ બનતો વાદળ.

રામ જાણે એને આવો શિદ વ્હેમ થઈ ગયો,

કાગળને કલમની સાથે પ્રેમ થઈ ગયો.

કલમ લખે મોરપિચ્છ, કાગળે કા'નાની ભાત

કલમ લખે તારલાં, ને કાગળ ઓઢી લે રાત.

કલમને રાજી કરવી, એનો નેમ થઈ ગયો,

કાગળને કલમની સાથે પ્રેમ થઈ ગયો.

કલમ લખે અષાઢ, વરસે કાગળ ધોધમાર,

કલમ લખે જુદાઈ, ને કાગળ રોવે ચોધાર.

આટલો બધો ગાઢ ક્યારે, ને કેમ થઈ ગયો !

કાગળને કલમની સાથે પ્રેમ થઈ ગયો.

ઓસબિંદુ કલમ લખે, કાગળ નીપજાવે ફૂલ,

હવા લખે જ્યાં કલમ, કાગળ ગાયબ, ગૂલ.

પૂછે કલમ મુજથી દૂર તું કેમ થઈ ગયો ?

કાગળને કલમની સાથે પ્રેમ થઈ ગયો.

કાગળનો સંગાથ એનો પણ નેમ થઈ ગયો,

કલમનેય કાગળની સાથે પ્રેમ થઈ ગયો.