હળવાશ ૨૪

ચોતરફથી છે વ્યથાઓ, દુશ્મનો ચોપાસ છે.

હાથમાં છે હાથ તારો, તો મને હળવાશ છે.

આંખમાં તારી મને શીતળ અમી વર્તાય જો,

કેમ હું જાઉં સુરાલય; ક્યાં હવે કોઈ પ્યાસ છે !

શું ખબર તાકાત કેવી પ્રેમમાં હોતી હશે !

પ્રેમના બળથી ઘણાએ સર કર્યાં આકાશ છે.

વાહ ! કેવી મિત્રતા; કેવો ભરોસો દોસ્ત પર !

દ્વારને ખુદ થી વધુ સાંકળ ઉપર વિશ્વાસ છે !

એક અમથા દોષથી, દોષિત ગણોના કોઈને

લીમડો કડવો ભલે, પણ છાયડામાં 'હાશ' છે

'અર્થ' મારા કાવ્યમાં સીધો સરળ હોતો નથી

લાગશે આભાસ પણ જો, એ જ મારા શ્વાસ છે.