હાંફળ - ફાંફળ
હાંફળ - ફાંફળ
દરવાજે દીધા આગળિયાં, અંદર હાંફળ - ફાંફળ,
ઓરા આવી હરિ... હેતથી ઉઘાડોને સાંકળ...
તાંબુ ટીપે લોટી થાશે, માટી માંથી નાંદ,
પંચતત્વના પૂતળામાં આ શું ગાજે સંવાદ,
રણકારે પરખાતી માટી, લોટી આગળ - પાછળ,
ઓરા આવી હરિ...
દિવસ આથમે કાયા ઘડતાં, ઉગતા પ્હોરે શ્વાસ,
પળના ધાગે દીધા પરોવી, ઝળહળતાં અજવાસ,
પર્ણ ઢળે ત્યાં ઝાકળને પવન વહે ત્યાં જાય ,
ઓરા આવી હરિ...
પળને જો પારખતી હાલું, ગુંજે નાદ નિરંતર,
રામ - રહીમા અચલ પંથમાં શાને દેખું અંતર,
ઝીણા તારે ચાદર ઓઢી ખૂંટી રહ્યાં છે અંજળ,
ઓરા આવી હરિ...