పలికే వారుంటే
పలికే వారుంటే
చిరాకులన్నీ తీరేలా
మరలా ఆశలు మోసులు వేసేలా
కాస్త ప్రేమతో
పలికే వారుంటే
కన్నుల ధారలు ఆగేలా
బాధల బరువు తగ్గేలా
కాస్త ఓదార్పుతో
పలికే వారుంటే
కష్టాల కడలిలో కొట్టుకుపోతున్నప్పుడు
బలవంతపు బంధాలు అల్లుకున్నప్పుడు
అవమానాల రక్కసులు హత్తుకున్నప్పుడు
సొంత నీడను నమ్మలేక
నోరు తెరిచి అడగలేక
మాట రాక
మనసు మూగబోయినప్పుడు
కాస్త గౌరవం ఇస్తూ
మనిషిలా మనల్ని గుర్తిస్తూ
మనల్ని సకారాత్మకత వైపు నడిపించే
మనిషి ఒకరు ఉంటే
అంత కన్నా ఏం కావాలి
మనసున మనసై
బ్రతుకున బ్రతుకై
అని సంతోషంతో పాడుకోగలిగితే
అలసిన ఈ జీవికి ఇంకేం కావాలి