प्रेमाची फुलबाग
प्रेमाची फुलबाग
तुझ्या आठवांचा झुला
माझ्या मनोमनी झुले
स्वप्नी झुला झुलताना
मनी प्रेमांकुर फुले !
स्पर्श तुझा मोरपीस
मोहरते माझे मन
डोळ्यातल्या भाषेतच
पटे प्रीतीची ही खूण !
कसे सांगू सख्या तुला
माझी अबोल ही प्रीत
ऐकण्यास आसुसले
तुझ्या श्वासातले गीत !
धुंद श्वासांचा हा गंध
श्वास श्वासात मिसळे
एकरूप होऊ दोघे
प्रीत हृदयी उसळे !
चिंब होऊ या प्रेमात
साहवेना हा दुरावा
तुझ्या मिठीत सख्या रे
स्वर्ग माझ्या हाती यावा !
पौर्णिमेच्या चांदराती
प्रीत दर्याला उधाण
चंद्रमिठी प्रणयाची
अंगी चांदणं गोंदण !
फुलबाग ही प्रेमाची
सदा रहावी फुलत
राहो टवटवी सदा
प्रेमकळ्या उमलत !!