Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Shaktiprava Mishra

Tragedy


4.3  

Shaktiprava Mishra

Tragedy


ସ୍ତ୍ରୀ ଲୋକ

ସ୍ତ୍ରୀ ଲୋକ

3 mins 252 3 mins 252

            କଲୋନୀର ଜଣେ ପୁରୁଷଙ୍କର ଚରିତ୍ର ଉପରେ ସ୍ତ୍ରୀ ଲୋକମାନେ କିଛି ଟିକ୍କା ଟିପ୍ପଣୀ କରୁଥିବା ଦୀପା ଶୁଣିଲା । ପୁରୁଷଟିର ସ୍ତ୍ରୀ ଥିଲା ଖୁବ ପତଳା ,ଗୋରା ଆଉ ସୁନ୍ଦରୀ । ଏଇ କଲୋନୀର ଆଉ ଗୋଟିଏ ସ୍ତ୍ରୀ ସହିତ ତାର ଅଧିକ ମିଳାମିଶା ଥିଲା । ସେଇ ସ୍ତ୍ରୀ ଟି ଦୀପା ଘରୁ ଦୁଇଟି ଘର ଛାଡି ରୁହେ । ଅନେକ ବର୍ଷ ହେଲାଣି ସିଏ ତା ସ୍ୱାମୀକୁ ଛାଡିଦେଇ ଏଇଠି ଏକୁଟିଆ ଭଡାରେ ରହୁଛି । ଚେରମୂଳ ଆଉ ଜଡ଼ିବୁଟି ବ୍ୟବସାୟ କରି ଚଳୁଛି । ଗୋଟିଏ ବୋଲି ଝିଅ ତାର ବାହାରେ ହଷ୍ଟେଲରେ ରହି ପାଠ ପଢ଼େ ।   ଦିନେ ରାତିରେ ନିଦ ହେଲାନି ଦୀପାକୁ । ମୁହଁ ଅନ୍ଧାର ଥିବା ବେଳେ ଖଟରୁ ଉଠିପଡ଼ିଲା ସିଏ । ବାଲକୋନୀକୁ ଯାଇ ଉଦୟ ସୂର୍ଯ୍ୟଙ୍କୁ ଦେଖିବ ବୋଲି ମନସ୍ଥ କରି ସେଠି ଚେୟାରଟିଏ ପକେଇ ବସିରହିଲା । ହଠାତ୍ ତା ନଜର ପଡ଼ିଲା ସେଇ ପୁରୁଷଟି ଉପରେ । ଯେଉଁ ସ୍ତ୍ରୀଟି ତା ଘରପାଖେ ରହୁଥିଲା ତାରି ଘରୁ ବାହାରି ଆସୁଥିଲା ଲୋକଟି । କେବଳ ଲୁଙ୍ଗି ଖଣ୍ଡିଏ ପିନ୍ଧିଥିଲା ସିଏ ଆଉ ତା ଖୋଲା ଦେହରେ ପଡ଼ିଥିଲା ଗାମୁଛାଟିଏ ।

   ଦୀପା ଆବାକାବା ହୋଇଗଲା । ଭାବିଲା ଲୋକଟି ତାହେଲେ ନିତି ରାତିରେ ଆସି ପାହାନ୍ତା ଅନ୍ଧାରରେ ତା ନିଜ ଘରକୁ ଫେରିଯାଉଛି । ଏକଥା ତା ସ୍ତ୍ରୀ ବି ଜାଣୁନି । ଆଜିଯାଏଁ ସେ ଅନ୍ୟମାନଂକ କଥାକୁ ବିଶ୍ୱାସ କରୁନଥିଲା ସିନା କିନ୍ତୁ କଥା ତ ଏ ଯାଏଁ ଯାଉଛି ଏଠି . . . ବାପ୍ ରେ ବାପ୍ ! ମୁଣ୍ଡରେ ହାତଦେଇ ଘଡ଼ିଏ ବସିଗଲା ଦୀପା ।

   ରାତି ପାହିଯିବାରୁ ଦୀପା ତଳକୁ ଗଲା ଫୁଲ ତୋଳିବାକୁ । ସେଇ ସ୍ତ୍ରୀଲୋକଟି ବିକଳ ହୋଇ ଧାଉଁଥିବା ଦେଖି ତାକୁ ପଚାରିଦେଲା, ଏତେ ସକାଳୁ ଏମିତି ବ୍ୟସ୍ତହୋଇ ଧାଉଁଛ ଯେ ! ଆଖି ଛଳଛଳ କରି ବଡ଼ କରୁଣ ଭାବରେ ସେ କହିଲା ,ଦାସ ମଉସାଙ୍କ ସ୍ତ୍ରୀଙ୍କର ଆକ୍ସିଡେଂଟ୍ ହୋଇଯାଇଛି । ଏବେ କୋମାରେ ଅଛନ୍ତି ସିଏ । କେହି ନାହାନ୍ତି ତାଙ୍କ ପାଖରେ । ତାଙ୍କ ପାଖକୁ ହସପିଟାଲ ଯାଉଛି ମୁଁ । ଓହୋ ...ତାଙ୍କ ସ୍ତ୍ରୀ କୁଆଡେ ଯାଇଥିଲେ ?

--ତାଙ୍କ ବାପଘର ଗଂଜାମ ଯାଇଥିଲେ । ଆଜି ଘରକୁ ଫେରୁଥିଲେ । ରସୁଲଗଡ଼ ପାଖରେ ଆକ୍ସିଡେଣ୍ଟ ହୋଇଗଲା । ଏଇ ଖବର ଦେବାପାଇଁ ତ ମଉସା ପାହାନ୍ତାରେ ଆସି ମୋ ଘର ଦୁଆର ବାଡେଇଥିଲେ ।

-- ହଁ...ଦାସବାବୁ ତ ଏଇ କିଛି ସମୟ ତଳେ ତୁମ ଘରୁ ବାହାରି ତାଙ୍କ ଘରକୁ ଯିବା ମୁଁ ଦେଖିଛି ।

- ମୋତେ ବାହାରିବା ପାଇଁ ଯାହା ସମୟ ଲାଗିଲା । କଥାଟା ଶୁଣିଲାବେଳୁ ମୋ ମୁଣ୍ଡ ଆଉ କାମ କରୁନି । ମାଉସୀଙ୍କର କିଛି ନ ହୋଇଥାଉ । ମୁଁ ଆସୁଛି ଦିଦି..….। ଡେରିକଲେ ସେପଟେ କିଛି ବି ଅଘଟଣ ଘଟିଯାଇପାରେ କହି ଜୋରଜୋର ପାଦ ପକେଇ ସ୍ତ୍ରୀ ଟି ଆଗକୁ ପଳେଇଗଲା ।

         ପରଦିନ ସାଈର ସବୁ ସ୍ତ୍ରୀ ମାନେ ଏକାଠି ମିଶି ଦାସବାବୁଙ୍କ ସ୍ତ୍ରୀ ର ମୃତଦେହକୁ ଦର୍ଶନ କରିଲେ । ଫେରିବା ବେଳେ ସେମାନଙ୍କ ଭିତରୁ ଜଣେ କହିଲା ,ମଳୁ ଖୋଜୁଥିଲା କାକର ପାଣି ....ବଇଦ କହିଲା ଦେ ତୋରାଣି । ଗଲାକାଲି ରାତିରେ ପରା ଲୋକଟା ପଶିଥିଲା ସେ ସ୍ତ୍ରୀ ର ଘରେ । ପାହାନ୍ତାରେ ତା ଘରୁ ବାହାରିବା ବେଳେ ମୁଁ ନିଜେ ତାକୁ ଦେଖିଛି । ଏମିତି ଚରିତ୍ରହୀନ ଲୋକର ସ୍ତ୍ରୀ ତ ମରିଯିବା କଥା । ସମସ୍ତେ ମିଳିମିଶି ସେ ଲୋକଟିକୁ ଛିଃ ଛିଃ କରୁଥିଲେ | 

      ଦୀପା ଭାବୁଥିଲା ଏ ଦୁନିଆରେ କେତେବା ଏମିତି ଲୋକ ଥିବେ ଯିଏ ନାରୀ ପୁରୁଷର ମିଳାମିଶାକୁ ଯୌନତାର ଆଖିରେ ନ ଦେଖି ଅମଳିନ ସମ୍ପର୍କର ନାଁ ଦେଇପାରୁଥିବେ । ବୋଧହୁଏ ଜଣେ ବି ନୁହେଁ । ସକାଳେ ସେ ସ୍ତ୍ରୀଲୋକଟି ସହିତ କଥାବାର୍ତା କରିନଥିଲେ ସେ ବି ଏଇ କଲୋନୀର ମହିଳାମାନଙ୍କ ଭଳି ଦାସବାବୁଂକୁ ଏକ ଚରିତ୍ରହୀନ ପୁରୁଷର ନାଁ ଦେଇନଥାନ୍ତା କି ?


Rate this content
Log in

More oriya story from Shaktiprava Mishra

Similar oriya story from Tragedy