Best summer trip for children is with a good book! Click & use coupon code SUMM100 for Rs.100 off on StoryMirror children books.
Best summer trip for children is with a good book! Click & use coupon code SUMM100 for Rs.100 off on StoryMirror children books.

Sudhanjali Mishra

Tragedy Inspirational


3  

Sudhanjali Mishra

Tragedy Inspirational


ରେବତୀର ପୁନରାବୃତ୍ତି

ରେବତୀର ପୁନରାବୃତ୍ତି

3 mins 448 3 mins 448


ଆଜିର ସଭ୍ୟତାରେ ଦେଶର ପ୍ରଗତି ସାରା ବିଶ୍ବବିଦିତ ହେଲେ ମଧ୍ୟ କେତେ ଯେ ରେବତୀ ବଳି ପଡିଛନ୍ତି ତା'ର ହିସାବ ନାହିଁ । କଳା,ସାହିତ୍ୟ,ଶିକ୍ଷା,ସଂସ୍କୃତିର ଗାରିମା ଡିଣ୍ଡିମ ପିଟୁଥିବା ବେଳେ ପୁରପଲ୍ଲୀରେ କେତେ ଯେ ନାରୀ ଅବହେଳିତା,ଅତ୍ୟାଚାରିତା,ଶିକ୍ଷାରୁ ବଞ୍ଚିତା ତାହା କୁହା ନ ଯାଇପାରେ । କେବଳ ସହର ଆଉ ତା'ନିକଟବର୍ତ୍ତୀ ଅଞ୍ଚଳ ଗୁଡିକ କିଛି ମାତ୍ରାରେ ଶିକ୍ଷା ଓ ସ୍ବାସ୍ଥ୍ୟର ସୁବିଧା ପାଉଥିବା ବେଳେ ଦୂରରେ ଥିବା ଅଞ୍ଚଳ ଗୁଡିକ ଅବହେଳିତ ହୋଇପଡୁଛି । ଦେଶର ପ୍ରଗତି କେବଳ ନେତାମାନଙ୍କ ଭାଷଣର ବାହାସ୍ପୋଟରେ ମିଳେଇ ଯାଉଛି । ଏବେ ମଧ୍ୟ ଅନେକ ରେବତୀ ଅନେକ ଅଞ୍ଚଳରେ ବଞ୍ଚିଛନ୍ତି । ପୁଣିଥରେ ରେବତୀର ପୁନରାବୃତ୍ତି ଘଟିଛି ।

  

      ସହର ଠାରୁ ଦୂରରେ ଅବସ୍ଥିତ ସୁନ୍ଦର ପଲ୍ଲୀ ଗାଁ ମାଧବପୁର । ପ୍ରକୃତି ବିମଣ୍ଡିତ, ସବୁଜିମାରେ ପରିପୂର୍ଣ୍ଣ, ଶାନ୍ତମୟ ପରିବେଶ ବ୍ରାହ୍ମଣ ଶାସନ ଟିଏ । ଶୃଙ୍ଖଳିତ ଓ ସୁସଂସ୍କୃତିକୁ ବହନ କରୁଥିବା ହେତୁ ଗ୍ରାମବାସୀ ମାନେ ନିଜ ଗ୍ରାମକୁ ନେଇ ଗୌରବାନ୍ବିତ ମନେ କରୁଥିଲେ । ସେହି ଗ୍ରାମର ଗୋଟିଏ ମଧ୍ୟବିତ୍ତ ପରିବାରରେ ଜନ୍ମ ଗ୍ରହଣ କରିଥିଲା ରେବତୀ, ଶ୍ରଦ୍ଧାରେ ସମସ୍ତେ ତାକୁ ରେବି ବୋଲି ଡାକୁଥାନ୍ତି । ଡ଼ଉଲ ଡାଉଲ ଚେହେରା ସାଙ୍ଗକୁ ସୁମଧୁର କଣ୍ଠ ଓ ଅମାୟିକ ବ୍ୟବହାର ସମସ୍ତଙ୍କୁ ଆକର୍ଷଣ କରୁଥିଲା । କିନ୍ତୁ ରେବିର ପାଠପଢା ନବମ ଶ୍ରେଣୀରେ ହିଁ ସମାପ୍ତ ହୋଇଗଲା । ଏକ ସମ୍ଭ୍ରାନ୍ତ ଜମିଦାର ଘରର କୁଳବଧୂ ରୂପେ ବାଲ୍ୟ ବିବାହ ପ୍ରଥାରେ ଛନ୍ଦି ହୋଇଗଲା ରେବି । ଗୃହଯୁକ୍ତ ହୋଇ ଶାଶୁଘରେ ପାଦଦେବା କ୍ଷଣି ପରିବାରର କନ୍ଦଳକୁ ନେଇ ସ୍ବାମୀଙ୍କର ମୃତ୍ୟୁ ,ପରିବାର କ'ଣ ? ,ସ୍ବାମୀସୁଖ କ'ଣ ଜାଣିବା ପୂର୍ବରୁ ମଥାରେ ବିଧବାର କଳଙ୍କ ଟିକା ମାଖି ଫେରିଆସେ ବାପଘରକୁ ରେବି । ଯଦିଓ ବାଲ୍ୟବିବାହ ଉଚ୍ଛେଦ ହୋଇଯାଇଥିଲା ତଥାପି ସେ ସେଥିରୁ ବାଦ୍ ଯାଇନଥିଲା । ବାପଘର ସମସ୍ତେ ରେବିକୁ ପୁରୀ ନେଇ ଶୁଦ୍ଧିକ୍ରିୟା କରାଇ,ପୁନଃବିବାହ ପାଇଁ ଶଙ୍ଖା ଚୁଡି ପିନ୍ଧାଇ ନେଇ ଆସିଲେ ଗ୍ରାମକୁ । କିନ୍ତୁ କେହିହେଲେ ଚିନ୍ତା କଲେ ନାହିଁ ରେବି ପୁଣିଥରେ ପାଠପଢୁ,ନିଜ ଗୋଡ଼ରେ ନିଜେ ଠିଆହେଉ ,ଆତ୍ମନିର୍ଭର ଶୀଳ ହେଉ,"ସତେ ଯେମିତି ଝିଅ ଜନମଟା ପରଘରକୁ " ସେ କେବଳ ବିବାହ କରିବ,ପୁଅଝିଅର ମା ହେବ ଆଉ ଘର ସମ୍ଭାଳିବ । ତେଣୁ ପୁନଃବିବାହରେ ଛନ୍ଦି ହୋଇଗଲା ରେବି । ସେ ପୁଣିଥରେ ବଳି ପଡିଗଲା ସମାଜ ଆଗରେ । ଅମାବାସ୍ୟା ଅନ୍ଧକାର ଚନ୍ଦ୍ରମାକୁ ଗୋଟିଏ ଦିନ ଲୁଚାଇପାରେ ସତ ହେଲେ ସବୁଦିନେ ନୁହଁ, ସତ କେବେ ବି ଲୁଚି ରହେନା ।


ଦ୍ବିତୀୟ ବିବାହ କରିଥିବା ବର ଯେତେବେଳେ ରେବିର ଅତୀତ କଥା ଜାଣିପାରିଲା ସେତେବେଳେ ରେବି ଉପରେ ତାର ଅତ୍ୟାଚାର ବଢିଗଲା । ବାପଘରର ଗେହ୍ଲୀଝିଅ ଶାଶୁଘରର ଚାକରାଣୀ ।ସେ କେବଳ ଦୁଇପୁତ୍ରର ମୁଖକୁ ଚାହିଁ ସବୁ ଦୁଃଖକୁ ପିଇଯାଉଥିଲା ,କାରଣ ସେ ଜଣେ ମାଆ । ଦିନେ ନା ଦିନେ ଆଲୋକର ସନ୍ଧାନ ପାଇବ,ଏହି ଆଶାରେ ସେ ସର୍ବଂସହା ପାଲଟିଗଲା । ଭାଗ୍ୟର ବିଡ଼ମ୍ବନା ଯେହେତୁ ଶିକ୍ଷାର ଆଲୋକ ଶିଖାଟି ତା'ପାଖରେ ନଥିଲା ତେଣୁ ନା, ସେ ନିଜେ ଜଳିପାରିଲା ନା ସେ ଅନ୍ୟକୁ ଆଲୋକିତ କରିପାରିଲା । କେବଳ ସଂସାର ବନ୍ଧନରେ ବାନ୍ଧିହୋଇ ମାୟା ମୋହରେ ଘାଣ୍ଟିହୋଇ ସମସ୍ତଙ୍କ ଆଦରର କୁଳବଧୂଟିଏ ହୋଇପାରିଲା । ପୁଣିଥରେ ବୋଝ ଉପରେ ନଳିତା ବିଡା ପରି ରେବିର ସ୍ବାମୀ ନେଇ ଆସିଲେ ଆଉ ଏକ ସାଥୀ ଯିଏକି ରେବିକୁ ଘରକାମରେ ସାହାଯ୍ୟ କରିବ ଆଉ ଘରସମ୍ଭାଳିବ ,ନାଆ ତାର ସଉତୁଣୀ ।


ପୁରୁଷ ବା କିପରି ବୁଝିପାରିବ ନାରୀର ମନକଥା ? ନାରୀ ସବୁ ଦୁଃଖକଷ୍ଟକୁ ସହ୍ୟକରିପାରେ ହେଲେ ସଉତୁଣୀ ଜ୍ବାଳାକୁ କେବେ ସହ୍ୟ କରିପାରେ ନାହିଁ । ସେହିପରି ରେବି କ୍ଷେତ୍ରରେ ମଧ୍ୟ ତାହା ଘଟିଥିଲା । ସେ ବି ତ ଜଣେ ନାରୀ,କେମିତି ସହ୍ୟ କରିପାରିଥାନ୍ତା ? ଯଦି ରେବି କିଛି ପ୍ରତିବାଦ କରୁଥିଲା ତେବେ ଗାଳିମାଡ଼ ସହ ଥୁଣ୍ଟା ଶୁଣିବାକୁ ପଡୁଥିଲା "ତୁ କିପରି ଦ୍ବିତୀୟ ବିବାହ କଲୁ ? ମୁଁ ସେହିପରି ଦ୍ବିତୀୟ ବିବାହ କଲି । ରେବି ଅଗତ୍ୟା ଭାଗ୍ୟକୁ ନିନ୍ଦି ସଉତୁଣୀ ଜ୍ବାଳାକୁ ମଧ୍ୟ ମୁଣ୍ଡପାତି ସହିନେଲା । ସବୁବେଳେ ନିଜ ଭାଗ୍ୟକୁ କୋଷୁଥାଏ । ଆଜି ଯଦି ମୁଁ ଦୁଇ ଶ୍ରେଣୀ ଅଧିକା ପାଠ ପଢିଥାନ୍ତି ତାହାହେଲେ ମୋତେ ଏତେ କଷ୍ଟ ସହ୍ୟ କରିବାକୁ ପଡିନଥାନ୍ତା । ମୁଁ ନିଜେ ଆତ୍ମନିର୍ଭରଶୀଳ ହେବା ସହ ମୋ ଦୁଇଛୁଆକୁ ଯୋଗ୍ୟ କରିପାରିଥାନ୍ତି । ଜୀବନରେ ଶିକ୍ଷାରମୂଲ୍ୟ କେତେ ଯେ ଗୁରୁତ୍ବ ବହନ କରେ ତାହା ସେ ହୃଦୟଙ୍ଗମ କରିପାରିଥିଲା । ଏହିପରି ଚିନ୍ତା କରିକରି ଦୁଃଖରେ ଦୁଃଖରେ ଜୀବନର ପରିସମାପ୍ତି ଘଟିଲା । ଶେଷରେ କେବଳ ଏତିକି ଶୁଭୁଥିଲା "ଲୋ ..ରେବି ,ଲୋ ..ନିଆଁ, ଲୋ ...ଚୂଲି,ଝିଅ ପିଲାଟା ରନ୍ଧାବଢା ଶିଖ୍,ଶାଶୁ ଘରକୁ ଯିବୁ ।"

             



Rate this content
Log in

More oriya story from Sudhanjali Mishra

Similar oriya story from Tragedy