ସୂର୍ଯ୍ୟୋଦୟ

ଏକ ଅକୁହା କାହାଣୀ ନିର୍ଦ୍ଦିଷ୍ଟତା  ଆଶାରେ

ଅନିର୍ଦ୍ଦିଷ୍ଟ ହୋଇ ଗଢି ଚାଲିଛି

ସମୁଦ୍ର କୂଳେ ସୁକ୍ଷ୍ମ ବାଲି ଅଣୁ

ଅସ୍ଥିତ୍ୱ ଆଶାରେ ।

ବାଲି ଘର ତୋଳି ଚାଲିଛି

କିଛି ଜଣା ଅଜଣା ଅନୁଭୂତି

ସମ୍ପୂର୍ଣ୍ଣତା ଆଶାରେ ।

ଅସମ୍ପୂର୍ଣ୍ଣତାକୁ ଆପଣେଇ ନେଇଛି

ହୃଦୟ କୋହରେ ଅବରୁଦ୍ଧ ହୋଇ

ପ୍ରେମ ଆଶାରେ ।

ବିଶ୍ୱାସଘାତକତା କୁ ପିଇଚାଲିଛି

ଦୁନିଆ ନିକିତି ପର୍ଯାୟବିହୀନ

ସ୍ଥିରତା ଆଶାରେ ।

ଅସ୍ଥିରତାରେ ବୁଡିଚାଲିଛି

ପ୍ରଜାପତି ସପନରେ ଉଡିବୁଲି

ପାଖୁଡା ଆଶାରେ ।

କଣ୍ଟାରେ ନିଜକୁ ରକ୍ତାକ୍ତ କରିଚାଲିଛି

ମଣିଷ ଜୀବନର ପଶା ଖେଳରେ

ପାଇବା ଆଶାରେ

ସବୁ କିଛି ହାରିଚାଲିଛି

ଏଇ କଳା କିଟମିଟ ନିସ୍ତବ୍ଧ ରାତି

ଜୀବନର ଏକ ନିରାଟ ସତ୍ୟ

କିନ୍ତୁ ଉଜ୍ୱଳ ସୂର୍ଯ୍ୟୋଦୟ ମଧ୍ୟ ଅପରିହାର୍ଯ୍ୟ ।।