ଶାଶୂ ମାଆ ସିଏ ମୋର

ମାଆ ପରି ମୁଁ ମାଆଟେ ପାଇଛି

ଶାଶୂ ମାଆ ସିଏ ମୋର

ସୁଖ, ଦୁଃଖ ସବୁ ପଚାରି ବୁଝନ୍ତି

କରିନାନ୍ତି କେବେ ପର ।

ବୋଉ ବୋଉ ବୋଲି ଡାକିଦେଲେ ଥରେ 

ଭରି ଯାଏ ମନ ମୋର

ସ୍ନେହ, ଶ୍ରଦ୍ଧା ଦେଇ ଭଲ ସେ ପାଆନ୍ତି

ଥାଏ ପାଖେ ଥାଏ ଦୂର ।

ଦୋଷା ଦୋଷ ସବୁ କ୍ଷମା କରିଛନ୍ତି

ମାଆ ସେ ମମତାମୟୀ

କେତେ କଥା ମୋତେ ଶିଖାଇଛନ୍ତି ସେ

ଏ ମନ ତାଙ୍କୁ ଝୁରଇ ।

ଗାଳି ବି କରନ୍ତି ସ୍ନେହ ବି କରନ୍ତି

ଯେମିତି କରେ ମୋ ମାଆ 

ତାଙ୍କ ଗାଳି ପାଇଁ ସଜାଡ଼ି ହୁଏ ମୁଁ

ସ୍ନେହମୟୀ ତାଙ୍କ ନାଁ ।

ଦୁଃଖ, ଯନ୍ତ୍ରଣାରେ ପାଖେ ଠିଆ ହୋନ୍ତି

ସ୍ୱର୍ଗ ଠାରୁ ଗରୀୟସୀ

ତାଙ୍କ ଆଶୀର୍ବାଦ ସଦା ମୋର କାମ୍ୟ

ମିଳୁ ତାଙ୍କୁ ସବୁ ଖୁସି ।

ବୋହୂ ନୁହେଁ ଝିଅ ମୁଁ ଅଟେ ତାଙ୍କର

ଅତି ଆପଣାର ମୋର 

ମନର ବେଦନା ଦୂର ହୋଇଯାଏ

ଶୁଣି ତାଙ୍କ କଥା ସ୍ୱର ।

ଗାଁ ରେ ରୁହନ୍ତି ପଚାରି ବୁଝନ୍ତି

ଭଲ ମନ୍ଦ ସବୁ ମୋର

ମାଆ ପରି ମୁଁ ମାଆ ଟେ ପାଇଛି

ଶାଶୂ ମାଆ ସିଏ ମୋର ।