ପୁରୁଣା ଚିଠି ...

ତୁ ସିନା ଛାଡି ଚାଲିଗଲୁ

ସ୍ମୃତି ଆମ ସବୁ ରହିଗଲା ,

ତୋର ହାତ ଲେଖା ସେଇ

ପୁରୁଣା ଚିଠି ସବୁରେ l

ସାଇତି ରଖିଛି ସେସବୁ ,

ରଖିଥିବି ମଧ୍ୟ ଆଗକୁ l

ତକିଆ ତଳେ ବଂଚେଇ ରଖିଛି ,

ନିଈତି ରାତିରେ ପଢେ

ଗୋଟିଏ ଗୋଟିଏ ଚିଠି,

ତକିଆ ତଳେ ନିଶ୍ୱାସ ରୁନ୍ଧି

ହେଇଯାଉଥିବା ଚିଠି ଗୁଡିକୁ 

ନୂତନ ପ୍ରାଣ ସଂଚାର କରେ l

କେମିତି ମାରିବି ?

ତା ଭିତରେ ତୁ ଅଛୁ ପରା

ଆମ ସ୍ମୃତି ସବୁ ଅଛି ,

ତୋ ଚେହେରା ପରି

ଗୋଲ ଆଉ ସୁନ୍ଦର ,

ଶବ୍ଦମାନଙ୍କ ମେଳରେ l

ତାକୁ ନଈ ସୁଅରେ

ଭସେଇ ଦେବିନି ମୁଁ,

ତୁ ପରା ପାଣିକୁ ବହୁତ ଡରୁ l

ଚିରି ପାରିବିନି ତାକୁ

ତୋ ଆଙ୍ଗୁଠି ଟିକେ କାଟିଗଲେ

ପରା ତୁ ବହୁତ କାନ୍ଦୁ l

ଡଷ୍ଟବିନ ରେ ଫୋପାଡିବିନି

ତୋତେ ଡଷ୍ଟବିନ ର ଗନ୍ଧରେ

ବାନ୍ତି ହେଇଯାଏ ପରା l

ତାକୁ ନିଆଁ ରେ ଜାଳି ବି ଦେବିନି

ତୋ ଦେହରେ

ଗରମ ପାଣି ଠୋପେ

ପଡିଗଲେ ତୁ

ପରା ସହିପାରୁନି l

ନଈର ସୁଅ , ଚିରିଯିବା ର କଷ୍ଟ

ଆଉ ନିଆଁ ର ଜ୍ୱାଳା କେମିତି ସହିବୁ ?

ତୁ ସିନା କଥା ଦେଇ ଭୁଲିଗଲୁ

ମୁଁ କଥା ଦଉଛି , ମୁଁ ବଂଚିଥିବା ଯାଏ

ତୋତେ ବଂଚେଇ ରଖିଥିବି

ଏ ଚିଠି ଭିତରେ

ତୁ ଆଉ ମୁଁ ଏକାଠି ଥିବା

ଏଇ ଗୋଟିଏ ଘରେ l