ପ୍ରତୀକ୍ଷା

ପ୍ରତୀକ୍ଷା, ଗୋଟେ ପ୍ରେମିକର

କାହିଁ କେତେ ଯୁଗରୁ

ସବୁ ବନ୍ଧବାଡ ଡେଇଁ

ପ୍ରେୟସୀ ସହ ଏକାକାର ହୋଇଯିବାର

ବୋଧେ ଆଜି ଆସିଯିବ ସେ

ଏକୀଭୂତ ହୋଇଯିବ ମନ ଆଉ ପ୍ରାଣ

ସବୁ ବନ୍ଧନ ପର ହୋଇଯାଉ ପଛେ 

ସେ ଆସୁ

ଏ ପ୍ରତୀକ୍ଷାରେ ନିଦ ହଜେ, 

ଆଖିର ପାତକ ଶୁଖିଯାଏ 

ତଥାପି ସେ ଆସୁ

ତା ଠାରେ ତଲ୍ଲୀନ ହୋଇ

ନିଜକୁ ହଜେଇ ଦେବା ତ ପ୍ରେମର ପୂର୍ଣ୍ଣତା

ପରନ୍ତୁ ଏ ତଲ୍ଲୀନତାରେ 

କ'ଣ ପ୍ରେମର ପୂର୍ଣ୍ଣତା ଥାଏ ?

କେବଳ ପ୍ରତୀକ୍ଷା ହିଁ ପ୍ରତିକ୍ଷଣ

ଅଭୁଲା ସ୍ମୃତି ସବୁକୁ ସତେଜ ଓ ସଜଳ କରି

ମିଶିଯିବାର ଏ ପ୍ରବଣତାକୁ ପ୍ରବଳ କରାଏ

ବେଳେ ବେଳେ ମନେହୁଏ

କେବେ ନ ଆସୁ ସେ ପ୍ରେମିକା

ନ ମିଶୁ ଏ ପ୍ରେମିକ

ନ ଘଟୁ କେବେ ଏ ପ୍ରତୀକ୍ଷାର ଅନ୍ତ

କେବଳ ପ୍ରତୀକ୍ଷା ପ୍ରେମର ପ୍ରେମିକର

କାହ୍ନୁର ରାଧାର, କାହ୍ନୁର ଗୋପାଙ୍ଗନାଙ୍କର।