ପ୍ରୀତିର ପସରା

ପ୍ରୀତିର ପସରା ମେଲାଇ ବସିଛି

ଆସି ଲୁଟିନିଅ ପ୍ରିୟା

ଲାଜେଇ ଲାଜେଇ କଣେଇ କଣେଇ,

ଦୂରରୁ ଚାହୁଁଛ କିଆଁ ||

ତୁମପାଇଁ ମୁହିଁ ସାଇତି ରଖିଛି

ମୋର ଏ ଛୋଟ ହୃଦୟ

ତୁମ ବିନା ଆଉ ବୋଲ ମାନୁନାହିଁ,

ହେଉ ନାହିଁ ମନ ଥୟ ||

ଭଲ ପାଇବାର ଭାଗ୍ୟ ଆଜି ମତେ

ମିଳିଅଛି ତୁମ ପାଇଁ

ପାଖେପାଖେ ତୁମ ରହିଥିବି ମୁହିଁ,

ହେଇ ତୁମ ଦେହ ଛାଇ ||

ତୁମେ ସାଜିଗଲେ ସହଚରୀ ମୋର

ଜୀବନେ ମଧୁ ଭରିବ

ଜୀବନେ ଭରିଛି ଅସୁମାରୀ କଷ୍ଟ,

ତୁମେ ଯେ ତାକୁ ହରିବ ||

ଏତିକି ମାଗୁଛି ଥରେ ଶୁଣ ତୁମେ

ମୋର ପ୍ରେମ ନିବେଦନ

ମୋ ପରି ପ୍ରେମିକ ଆଉ ନମିଳିବେ,

ଖୋଜୁଥିବ ରାତି ଦିନ ||

ଦୁହେଁ ସାଜିଯିବା ଏଇ ଦୁନିଆଁର

ସବୁଠୁ ସୁନ୍ଦର ଯୋଡ଼ି

ଏତିକି ମାଗୁଛି ତୁମ ଆଗେ ଆଜି,

ମୋର ଦୁଇ ହାତ ଯୋଡ଼ି ||

*ସତ୍ୟଜିତ ସ୍ୱାଇଁ*

*ଅଡ଼ଶପୁର, କଟକ*