ପ୍ରେମ ପ୍ରତିଶ୍ରୁତି

ମୁଁ ପରମେଶ୍ୱର ଭାବି ତୁମକୁ 

ପରମ ଭକ୍ତ ହେବାର ଉତ୍କଣ୍ଠା ରଖିଛି,

ତୁମ ପାଖରେ ପ୍ରଭୁତ୍ଵ ସ୍ୱୀକାର କ୍ଷମତା ଅଛି ତ ।

ମୁଁ ପରମବ୍ରହ୍ମ ଭାବି ତୁମକୁ

ଲୀନ ହେବାର ଜିଜ୍ଞାସା ରଖିଛି,

ତୁମ ପାଖରେ ଲୀନ କରିବାର ମନ୍ତ୍ର ଜଣା ଅଛି ତ ।

ମୁଁ ପରମାତ୍ମା ଭାବି ତୁମକୁ 

ଦର୍ଶନ କରିବାର ଇଚ୍ଛା ରଖିଛି,

ତୁମ ପାଖରେ ଦର୍ଶନ ପାଇଁ ଯଥେଷ୍ଠ ସମୟ ଅଛି ତ ।

ମୁଁ ପ୍ରେମିକ ଭାବି ତୁମକୁ 

ସବୁ ପ୍ରେମ ଅଜାଡି ଦେଇ ପାରେ , 

ତୁମ ପାଖରେ ସାଇତିବା ଭଳି ହୃଦୟ ଅଛି ତ ।

ମୁଁ ତୁମକୁ ହୃଦୟ ଫଟା 

ବେଦନା ଭିତରୁ ଟାଣି ଆଣି ପରେ 

ତୁମ ପାଖରେ ଅପେକ୍ଷା କରିବାର ଧର୍ଯ୍ୟ ଅଛି ତ ।

ମୁଁ ବିଷ ଭାବି ତୁମକୁ

ପାନ କରିବାର ସାହାସ ରଖିଛି,

ତୁମ ପାଖରେ ବିଷ ଟେକି ଦବାର ସାହାସ ଅଛି ତ ।

ମୁଁ ଅନନ୍ତ ଭାବି ତୁମକୁ 

ଅନ୍ତର୍ଦ୍ଧାନ ହୋଇଯିବାକୁ ଚାହେଁ,

ତୁମ ପାଖରେ ଅନ୍ତର୍ଦୃଷ୍ଟି ରହିଛି ତ ।

ମୁଁ ସମୁଦ୍ରର ଭାବି ତୁମକୁ 

ସମୂହରେ ମିଶି ଯିବାକୁ ଚାହେଁ 

ତୁମ ପାଖରେ ସମ୍ବାସ ଦେବାର ସ୍ଥାନ ଅଛି ତ ।

ମୁଁ ମଶାଲ ଭାବି ତୁମକୁ 

ସେ ଆଲୋକ ତଳେ ନ୍ୟାୟ ଭିକ୍ଷା କରି ପରେ,

ତୁମ ପାଖରେ ଉପଯୁକ୍ତ ନ୍ୟାୟ ପାଳିକା ଅଛନ୍ତି ତ ।

ମୁଁ ମୃତ୍ଯୁ ଭାବି ତୁମକୁ

ବରି ନେବାର ସାହାସ ରଖିଛି ,

ତୁମ ପାଖରେ ମୁକ୍ତି ଦେବାର ସାମର୍ଥ୍ଯ ଅଛି ତ ।