ପ୍ରେମ-ଇନ୍ଧନ

ପ୍ରେମ ଦେହକୁ ଦେଖି ଉଇଁଲେ

ଦେହ ଦେହଳୀକୁ ଛୁଇଁଲେ

ବୋଲାଯାଏ ବିରାଡିଆ

ପୁଣି ପ୍ରେମ  ବ୍ୟକ୍ତିକୁ ଦେଖି ଆରମ୍ଭିଲେ

ଧନ ଦଉଲତ ଶୁଙ୍ଘିଦେଲେ

ଦିଶୁଥାଏ ବିକଳିଆ

ପ୍ରେମ ବରଂ ବ୍ୟକ୍ତିତ୍ଵକୁ ନେଇ

 ବ୍ୟବହାରକୁ ନେଇ ହେଲେ

ସ୍ଵର୍ଗୀୟ ସୁଷମାରେ ଭରା

ପୁରଦିଆ ଛେନା କାକରା ।

ପ୍ରେମ ଆଖିକୁ ଦେଖି ଲଟେଇଲେ

ଇଶାରାରେ କାହାଣୀ ରଚିଲେ

ବୋଲାଯାଏ ମାଇଚିଆ

ପୁଣି ପ୍ରେମ ପଛକୁ ଦେଖି ଲାଳେଇଲେ

ନିତମ୍ବ ଦୋଳନରେ ଛାଇଗଲେ

ଭବିଷ୍ୟବାଣୀ ମାଇପ ସୋଆଗିଆ

ପ୍ରେମ ବରଂ ପ୍ରତିଷ୍ଠାକୁ ନେଇ

ପରାକାଷ୍ଠାକୁ ନେଇ ହେଲେ

ଅମୂଲ୍ୟ ଅତୁଲ୍ୟ ପ୍ରେରଣା ବାରି

ତୃଷ୍ଣା ନିବାରଣେ ମିଳଇ ହରି ।

ପ୍ରେମ ପତ୍ରାଳାପରେ ସୁବାସିଲେ

ଚାଟିଙ୍ଗ୍ ସପିଙ୍ଗ୍ ରେ ଛୁଙ୍କିଲେ

ବୋଲାଯାଏ ପରକୀୟା

ପ୍ରେମ ପୁଣି ମୋବାଇଲରେ ଡେଇଁଲେ

ଲୁଚେଇ ଛପେଇ ଉଡି ବୁଲିଲେ

ଗନ୍ଧୁଥାଏ ବିଦେଶିଆ

ପ୍ରେମ ବରଂ ଆଳାପ ସଂଳାପକୁ ନେଇ

 ଆଦାନପ୍ରଦାନକୁ ନେଇ ହେଲେ

ମହାର୍ଘ୍ୟ ମହୌଷଧୀ ଛୁମନ୍ତର

ଜୀବନ ଯମୁନାରେ ଭଜାଣୀ ଧାର ।

ପ୍ରେମ ମଧ୍ୟସ୍ଥ ମାଧ୍ୟମରେ ଫୁଟିଲେ

ପୋଖରୀ ହୁଡ଼ାରେ ଭେଟହେଲେ

ବୋଲାଯାଏ ଅଳ୍ପଦିନିଆ

ପ୍ରେମ ପୁଣି ଗୀତସଂଗୀତରେ ମୁରୁକେଇଲେ

କବିକବିତାରେ ମୁକୁଲିଗଲେ

ବାସୁଥାଏ ହୁତୁହୁତିଆ

ପ୍ରେମ ବରଂ ହୃଦଆତ୍ମାରେ ଗଜୁରିଲେ

ବଳିଷ୍ଠ ବ୍ୟକ୍ତିତ୍ଵରେ ଚେଇଁଲେ

ଭରଣା ସାତ ଜନ୍ମର ବନ୍ଧନ 

ଯୋଗାଣ ଯୁବା ସୁଲଭ ଇନ୍ଧନ ।

ପ୍ରେମ ମନେ ମନେ ଭାବିଦେଲେ

ସ୍ୱପ୍ନ ଇଲାକାରେ ଭେଟହେଲେ

ବୋଲାଯାଏ ଏକପାଖିଆ

ପ୍ରେମ ପରା ଭେଟ ଭାଟରୁ କଅଁଲେଇଲେ

ବିରହ ନିଆଁରେ ସେକିହେଲେ

କୁହାଯାଏ ପତ୍ରଝଡିଆ

ପ୍ରେମ ବରଂ ଉତ୍ତମ ବୁଝାମଣାକୁ ନେଇ

ପରମ୍ପରା ଚୌହଦୀରେ ଗୁରୁମି ହେଲେ

ତୁଳସି ଚନ୍ଦନ ବାସି ଚହଟିବ

ମନରେ ମାନରେ ଖୁସି ଲଟକିବ ।