ମନୁଷ୍ୟତ୍ବ କିଛି ପ୍ରଶ୍ନବାଚୀ

ମନୁଷ୍ୟ କି ତୁମେ,ସର୍ବଶ୍ରେଷ୍ଠ ସୃଷ୍ଟି !  

ରଚୟିତା ଚିତ୍ରପଟେ ! 

ଅବା ପ୍ରଳପନ ,ମିଥ୍ୟା କଥାନ୍ତରେ ;

ଚାଲୁଅଛ ଅନ୍ଧ ବାଟେ !

ବନ୍ୟାରେ କ୍ଷୁଦ୍ର ଗୁଳ୍ମ ପରି ଯେ 

ଭାସିଯାଅ ତୁମେ ସ୍ରୋତେ; 

ପ୍ରଳୟଙ୍କରୀ ସେ ମହା ତାଂଡବରେ 

ଭୟ ତୁମକୁ ନାଶେ !

ମହା ବ୍ୟାଧି ଗ୍ର।ସେ ଶୀର୍ଣ୍ଣ ଶରୀର 

ଭିକ୍ଷୁକ ତୁମେ ସାଜ;

ରୌଦ୍ରଦଗ୍ଧI ମହୀ ତପ୍ତ ଆଭାରେ 

ଶୁଷ୍କ ତୁମରି ମୁଖ !

ଅର୍ଥ ତୁମକୁ ବାଧ୍ୟ କରିଛି  

ଅନର୍ଥର ରାଜପଥେ; 

ଉର୍ନତି ନାମେ ଭସ୍ମାସୁର ଯେ 

ଧ୍ବଂସ କରିଛ କେତେ !

ବିଜ୍ଞାନ ତୁମ ବୁଝିପାରିନାହିଁ 

ଜ୍ଞାନର ଗମ୍ଭୀରତା ;

ନେଇଛି ଜୀବନ ଦେଇପାରିନାହିଁ 

ତୃପ୍ତି ର ପରିଭାଷା ! 

ବନ୍ଦୀ କରିଛ ନିରୀହ ଜୀବନ 

ତୁମର ଆମୋଦ ପାଇଁ ;

ହେଲେ ବନ୍ଦୀ ଘରେ କେବେ କି ଭାବିଛ 

ଜୀବନର ମୂଲ୍ୟ କାହିଁ! 

ମୁକ୍ତ ଆକାଶେ ଉଡିବାର ଆଶା 

ଭାଙ୍ଗିଦେଇଛ ତୁମେ! 

ଯନ୍ତ୍ର ପରିକା ତୁମେ ଯେ ଚାଲୁଛ 

ଲିପ୍ସା ମୋହରେ ସତେ !

ଭୁଲିଛ ପ୍ରକୃତି ଭୁଲିଛ ଜୀବନ 

ପ୍ରେମ ତୁମ ବ୍ୟବସାୟ ; 

ଭାବନାକୁ ତୁମେ ପ୍ରତିଷ୍ଠାର ତୁଚ୍ଛ 

ନିର୍ଜୀବ ମୂଲ୍ୟରେ ମାପ ! 

କାହିଁ ଶ୍ରେଷ୍ଠପଣ ହଜିଛି କେଉଁଠି 

କାହିଁ ତୁମ ଅନୁଭୂତି ? 

ଅନ୍ଧ ପୁଟୁଳିର ଆବରଣେ ଅବା 

ମୁଦ୍ରିତ ତବ ଆଖି .....!!!!