କଥାର ମହକ

ଆଜିର କଥା ନଥାଏ କାଲିକି

କାଲିର କଥା ନଥାଏ ଆଜିକି l

ଜିଭ ଏକ ବଡ଼ ଅନର୍ଥ ବୀଜ

ଭଲ କୁ କରେ ଭେଲ ଚିଜ l

ସ୍ୱାଦ ସିନା ବାରେ ଜିଭ

ନରଖେ ବାକ୍ୟର ତ ଓଜ l

ସଂସାରରେ କଥାର ଗୁଣ

ଭଲ ମନ୍ଦର କରେ ଭିଆଣ l

ମିତ୍ର ଶତ୍ରୁ କରାଇ ସୃଷ୍ଟି ସେ

ଘର ଭାଙ୍ଗେ ଗଢ଼େ ସଦା ସେ l

ସାଧୁକୁ କରେ ଭଣ୍ଡ ସଇତାନ

ଭଣ୍ଡକୁ ଦିଏ ସାମାଜିକ ଓଜନ l

ଦୁନିଆଁଟା କଥାହାତ ମୁଠାରେ

ମଧୁର ବଚନ ତିଳକ ସରୁରେ l

ଖଳ ଲୋକର ବାଗେଇ କଥା

ସ୍ୱାର୍ଥ ପୁରଣେ ନାହିଁ ମୁଣ୍ଡ ବଥା l

ଭାଟ ନଟ ପୋଷନ୍ତି ପେଟ

କଥା କହି ଭଲ କରନ୍ତି ନାଟ l

ସଂସାରଟା ବାବୁ କଥାଗୋଲାମ

ରଚଇ ସଦା ଦୁଃଖ ସୁଖର ଧାମ l

କଥାର ମହକ ଜାଣଇ ଯିଏ

ସଂସାରେ ନିର୍ଦ୍ୱନ୍ଦେ ପୂଜିତ ସିଏ l

କଥାକୁ କବି ଲେଖକ କାଗଜେ

ଢାଳି ପୂଜା ପାନ୍ତି ନିଜ ମଗଜେ l

କଥାକୁ କହି ଜାଣିଲେ ସୁନ୍ଦର

ଧଳାକୁ କଳା କରିହୁଏ ସତ୍ୱର l

ବାକ୍ ଶକ୍ତିର ମହିମା ଅପାର

ବିଶ୍ୱ ଘଟ ସୁତର ଅତି ପ୍ରଖର l

କଥାରେ ଯୋଡ଼ିଲେ ମିଠା ନଥା

ରହେନା କିଛି ବାକି ତ ଅଯଥା l

ବାନ୍ଧିଛି ସାରା ବିଶ୍ୱକୁ କଥା ସୁତା

ଦୁର୍ମୁଲ୍ୟ ଶବ୍ଦ ବ୍ରହ୍ମସୂତ୍ର ସଳିତା l

ଶବ୍ଦବ୍ରହ୍ମର ଦ୍ୟୋତକ ରୂପୀ ଜିହ୍ୱା

ମାନବକୁ କରଇ ସେତ କିମିଆ l

ସଂସାର ଧାରକ ଅଟଇ ଜିହ୍ୱା

କଥା କାରିଗର ବିଷ ସୁଧା ପିଆ l

ମିଠା କଥା ମାନବ ଗୁଣର ସାର

କଟୁ କଥା କରିଥାଏ ସମ୍ପର୍କ ଖାର l

ହେ ଜିହ୍ୱା ଶବ୍ଦ ବ୍ରହ୍ମ କୋଟି ଜୁହାର

ସୁଦୃଷ୍ଟି ଢାଳି ତୁମ ସମାଜ କର ସ୍ଥିର l

*************∞************