କୋକୁଆ
କୋକୁଆ
ଫୋନ୍ ଲଗେଇକି ପଚାରିଲେ ଅଜା
କ'ଣ କିରେ ନାତି ନଟିଆ
ଆଈ କହୁଥିଲା ଫୋନ୍ କରିଥିଲୁ
କଥା ଅଛି ଅର୍ଜେଣ୍ଟିଆ ।
ନଟିଆ କହିଲା କହୁଅଛି ଅଜା
ଶୁଣୁଥିବ ଡେରି କର୍ଣ୍ଣ
ଶୁଭୁନାହିଁ ତୁମ କାନକୁ ଭଲକି
ତେଲ ମୋଟେ ପକାଉନ ।
ଗଜ ଗଜ ହୋଇ ପାଞ୍ଚ ଦଶ ଥର
କହିବାକୁ ନାହିଁ ବେଳ
କେତେ ଅଛି କାମ ଜାଣିଛ ମୋହର
ଟିକିଏ ବି ନାହିଁ ତର ।
ଲାଜ ନାହିଁ ତୋତେ ଏଠିକି ଥୋବରା
ଦେଖାଉ ଭେଳିକି ମୋତେ
ବଳଉଛି କେଉଁ କାମଟା ତୋହର
କହିଲୁ ନଟିଆ ଟିକେ ।
କହିଲା ନଟିଆ ଅନଲାଇନ୍ ରେ
ଚାଲୁଅଛି ପାଠପଢ଼ା
କରୋନା କାରଣୁ କୋକୁଆର ଭୟ
ଝୁଲୁଛି ସ୍କୁଲରେ ତାଲା ।
ଗାଳି ଦେଉଛନ୍ତି ମାଆବାପା ଖାଲି
ମିଳୁନାହିଁ ହାତଖର୍ଚ୍ଚା
କେମିତି ଚାଲିବ ମୋବାଇଲ ମୋର
ଜୀରୋ ଅଛି ବାଲାନ୍ସଟା ।
ପ୍ରିମିୟମ ଲିଗ୍ କ୍ରିକେଟ୍ ଚାଲିଛି
ପିଟୁଛନ୍ତି ଛକା ଚୈ।କା
ଜଡ଼ ଟିଏ ପରି ନଟିଆ ତୁମର
ବସିଅଛି ହୋଇ ବୋକା ।
ଗୁଗୁଲ୍ ପେ ବା ପେଟିଏମ୍ ଖୋଲ
ଟଙ୍କା କିଛି ଛାଡ଼ି ଦିଅ
ଆକାଉଣ୍ଟ ମୋର ଦେଖିବ ଭଲକି
ନ କରିବ ଭୁଲ୍ ଭାଲ ।
ହସୁଥିଲେ ଅଜା ଠାହାକା ମାରିକି
କହିଲେ ମେଞ୍ଚଡ ନଟ
ହରିକାଠ ହୋଇ ବସୁଛୁ କାହିଁକି
ବୁଲାଉନୁ ତୋର ବ୍ୟାଟ ।
ଛକା ଚୈ।କା ପରି ଖସିବ ଆକାଶୁ
ପୁଳା ପୁଳା ହୋଇ ଟଙ୍କା
ଚତୁର ବିଲୁଆ ପାଠପଢ଼ା ନାମେ
ନଟିଆ ମାରୁଛୁ ଫାଙ୍କା ।
ପଠେଇ ଦଉଚି ଏଇ ଥର ବାବୁ
ରିଚାର୍ଜ କରିବୁ ଫୋନ
ପଚାରି ବୁଝିବି ମୋ ବୋପାମାଙ୍କଠୁ
ପଢୁଥାଆ ସାବଧାନ ।