କାବ୍ୟ ନାୟିକା

କେବେ ପୌରାଣିକା

କେବେ କାଳ୍ପନିକା

କେବେ ତୁମେ ଆଧୁନିକା ,

କେବେ ସାଂସ୍କୃତିକା

କେବେ ସାମାଜିକା

ତୁମେ ଗୋ କାବ୍ୟ ନାୟିକା ।

କେବେ ଲାସ୍ୟମୟି

କେବେ ହାସ୍ୟମୟି

କେବେ ରଚ ବିଭୀଷିକା ,

କେବେ ଧର ଅସ୍ତ୍ର

କେବେ ଖୋଲ ବସ୍ତ୍ର

ସୁଶୀଳା କାବ୍ୟ ନାୟିକା ।

ତୁମେହିଁ ତ ସୃଷ୍ଟି

ତୁମେବି ତ ବୃଷ୍ଟି

ତୁମେ ପୁଣି ମରୀଚିକା ,

ତୁମେହିଁ ତ ଶୋଷ

ତୁମେ ଅବଶୋଷ

ତୁମେହିଁ କାବ୍ୟ ନାୟିକା ।

କେବେ ବିଷ କନ୍ୟା

କେବେ ବାରାଙ୍ଗନା 

କେବେ ତୁ ଗଂଗା ପରିକା ,

କେବେ ଋଷି ଧନ୍ୟା

କେବେ ବିଡ଼ମ୍ବନା

ଅପ୍ସରା କାବ୍ୟ ନାୟିକା ।

କେବେ ତୁ ଶ୍ରାବଣୀ 

କେବେ ତୁ ପାର୍ବଣୀ 

କେବେ ତୁ ଫଗୁ ହୋଲିକା ,

କେବେ ଅଭିମାନୀ

କେବେ ଅଭାଗିନୀ

ବିରହୀ କାବ୍ୟ ନାୟିକା ।