ହୃଦୟହୀନା
ହୃଦୟହୀନା
ଲୁହ ତ କେବେ ବି କାରଣ ଖୋଜେନା
ଆସିଯାଏ ଅବେଳରେ ,
ଅନ୍ତରରେ କିଏ ଦେଲେ ଟିକେ ବାଧା
ଅସରନ୍ତି ଲୁହ ଝରେ ।
ଅନ୍ତରରେ କୋହ ଜମାଟ ବାନ୍ଧିଲେ
ଆଖି ଡେଇଁ ବୋହିଯାଏ ,
ଛାଡ଼ ତମେ ଅବା କେମିତି ବୁଝିବ
କେମିତି ନିବିଡ଼ ସମ୍ପର୍କ ଇଏ ।
ଲୁହ ଦରିଆରେ ସ୍ବପ୍ନ ଡଙ୍ଗା ଭାସେ
ନିଦ ଆସେନା କି ରାତି ସରେନା
ସକାଳ ସୂରୁଜ ଦେଉଛି ଦରଜ
ତୁମ ପରି ସିଏ ହୃଦୟହୀନା ।
ତୁମ ବିନା ସାଥୀ ଜୀବନରେ ମୋର
ନାହିଁ କିଛି ଅଭିଳାଷ ,
ତୁମରି କଥାକୁ ଝୁରି ଝୁରି ଦିନେ
ଚାଲିଯିବ ଏ ନିଃଶ୍ୱାସ ।
ଜିଅନ୍ତା ଜୁଇରେ ଜଳୁଛି ଆଜି ମୁଁ
ଅକୁହା କାହାଣୀ ହୋଇ ,
ବଞ୍ଚିବାଟା ମୋର ଅଭିନୟ ଖାଲି
କା' ଆଗେ ପାରୁନି କହି ।
ସୂରୁଜ ଉଇଁଲେ , ଅନ୍ଧାର ରାତିରେ
ତୁମକୁ ଖୋଜେ ମୁଁ ମନେ ,
କାହିଁ ଗଲ ସାଥୀ ଅଧା ରଖି ପ୍ରୀତି
ଦୁଃଖ ଦେଇ ମୋ ଜୀବନେ ।