ହେ ଫକୀର !

  

ସଂକ୍ରାନ୍ତିରେ ତୁମେ ଜନମ ଲଭିଲ

                ସଂକ୍ରାନ୍ତିରେ ନେଲ ସମାଧି

ବିଧିର ବିଧାନ କେ କରିବ ଆନ

                 ସାରିବାକୁ ହୁଏ ଅବଧି ।

ସ୍ୱଳ୍ପ ଲୋକ ସିନା ସେ ପୂଣ୍ୟ ଲଭନ୍ତି

                     ଜନ୍ମ-ମୃତ୍ୟୁ ଏକା ତିଥି

ସଂକ୍ରାନ୍ତି ପୁରୁଷ ଦୁନିଆଁ ବୋଲଇ

                   ମହାଜ୍ଞାନୀ ମହାମତି ।

ଅଗ୍ରଜ ତୁମର ଜନ୍ମି ମରିଗଲେ

                  ମାତା ଭାଳେ କୁମରଙ୍କୁ

ତୁମ ଜନ୍ମ ପରେ କାଳ ଯମ ଡରେ

                   ବିକି ଦେଲେ ଫକୀରକୁ ।

ତେଣୁ ହେ ଫକୀର  ତୁମେ କର୍ମ ବୀର

                   ସେନାପତି କୋଳେ ଜନ୍ମ

ଅଭାବୀ ସଂସାର ତାଡ଼େ ଜମିଦାର

                   କଲ ସେନାପତି କାମ ।

ବିଲୁପ୍ତ ପରାଏ   ଓଡ଼ିଆ ଭାଷାର

                     ଜାଗ୍ରତ ପ୍ରହରୀ ସାଜି

ଭାଷା ସାହିତ୍ୟର ସେନାପତି ହେଲ

                    ମାନ ଅଭିମାନ ତେଜି ।

ଇଂରେଜ ଦମନ  ଭାଷା ଆନ୍ଦୋଳନ

                   ଏକା ସାଥେ ଚାଲୁ ଥିଲା

ସେନାପତି ରୂପେ ଯେ ହାତେ ବଲମ

                  ସେ ହାତେ କଲମ ଥିଲା ।

ଓଡ଼ିଆ ଗଳ୍ପର ସ୍ରଷ୍ଟା ତୁମେ ଆହେ

                    କାବ୍ୟ କବିତାର ଦ୍ରଷ୍ଟା

ଦେଶକୁ ସ୍ୱାଧୀନ କରିବାରେ ପଣ

                    ରଖି ଥିଲ ଦୃଢ଼ ନିଷ୍ଠା ।

ଜାତି ସେନାପତି ବୃତ୍ତି ସେନାପତି

                    ସାହିତ୍ୟର ସେନାପତି

ଫକୀର ମୋହନ ସେନାପତି ତୁମେ

                ବ୍ୟାସକବି ତୁମ ଖ୍ୟାତି ।