ଦିପାବଳୀ

ଅମାବାସ୍ୟାର ଅମାବୁକୁ ଚିରି ଆଲୋକମାଳାର ରୋଷଣି ଧରି,

ଦୀପାବଳି ଆଜି ଆସିଛି ଧରାକୁ ସଭିଙ୍କ ମନରେ ଆନନ୍ଦଭରି |

ପିତୃପୁରୁଷଙ୍କୁ ଏହି ଦିବସରେ ଶ୍ରଦ୍ଧାରେ ପିଲାଏ ଦିଅନ୍ତି ଶ୍ରାଦ୍ଧ,

କେତେସୁନ୍ଦର ଏ ପରମ୍ପରା ସତେ ସେଥିରେ କେବେହେଁ ନ ଲାଗୁ ଦାଗ |

ସଞ୍ଜ ନଇଁଗଲେ ଆଲୋକମାଳାରେ ଘର ଓ ବାହାର ଝଲସି ଉଠେ,

କାଉଁରିଆ ଜାଳି ପିତୃପୁରୁଷଙ୍କୁ ବଡବଡୁଆ ହୋ ପୁଅତ ଡାକେ |

ଏ ମାସରେ ବହୁ ପୋକ ହୋଇଥାନ୍ତି ଦୀପର ନିଆଁରେ ମରନ୍ତି ସିଏ,

ଦୀପଜାଳି ଏହି ପରବ ପାଳିଲେ ପର୍ବର ଉଦ୍ଦେଶ୍ୟ ସାଧିତ ହୁଏ

ଦୀପାବଳି ହେଲା ଆଲୋକର ପର୍ବ ଦୀପଜାଳି ଏହି ପରବ ହେଉ,

ଆତସବାଜିର ପ୍ରତିଯୋଗିତାରେ ପ୍ରଦୁଷଣ ଆଉ ବଢା ନଯାଉ |

ପରବଦିନରେ ପରବ ପାଳିବା ହସ,ଖୁସି,ମଜାଆନନ୍ଦକରି,

ହସ,ଖୁସି,ମଜା ମାନେ ନୁହେଁଆମେ ପରିବେଶ କଥା ଯିବାଟିଭୁଲି |

ବାଣ କେତେ କ୍ଷତି କରୁଛି ଆମର ଜାଣିସୁଧା ଆମେ ମାରୁଛେ ବାଣ,

କ୍ଷଣିକସୁଖରେ ଆହ୍ଲାଦିତ ହୋଇ ପରିବେଶ ପ୍ରତି ଦେଉନେ ଧ୍ୟାନ |

କେତେ ମରୁଛନ୍ତି ପୋଡିହୋଇ ବାଣେ ବାରୁଦ ବାୟୁକୁ କରିଦୁଷିତ,

ଡାକି ଆଣୁଅଛି ମୃତ୍ୟୁ ଓ ବିପଦ ତଥାପି ମଣିଷ ନୁହେଁ ଚିନ୍ତିତ |

ଆଲୋକର ପର୍ବ ଦୀପାବଳି ଏଯେ ଆଲୋକରେ ଘର ସଜିତ ହେଉ,

ଫୋଟକା ଫୁଟାଇ ବାୟୁ ପ୍ରଦୁଷଣେ ଅକାରଣେ ରୋଗ ଡକା ନଯାଉ |