ଚକଲେଟ ଦିବସ

ନାତୁଣୀ ଗେଲି ଆସିଲା ହଲି

   କହିଲା ଆହେ ଜେଜ l

ଦେବ କି ନାହିଁ ମାଗୁଛି ମୁହିଁ

  ଗୋଟିଏ ଭଲ ଚିଜ ll

ପଢ଼ୁଛ ନିତି, ଦାନ୍ତ ନିକୁଟି

   ପୁରାଣ ଭାଗବତ l

ଲେଖୁଛ ଗଳ୍ପ କାହାଣୀ କଳ୍ପ 

  ଛନ୍ଦରେ ବାନ୍ଧି ଗୀତ ll

କି ଦିନ ଆଜ କହିବ ଜେଜ

   ଜୁଲାଇ ମାସ ସାତ l

ମୁହିଁ କହିଲି ଶୁଣ ଲୋ ମଲ୍ଲି 

   ପୁଜା ମନସା ମାତ ll

ଗେହ୍ଲି ନାତୁଣୀ କହଇ ପୁଣି

  ତୁମେ ଗୋଟିଏ ଖଣ୍ଟ l

ଶାସ୍ତ୍ରରେ କିବା ନାହିଁକି ଅବା 

   ଦିବସ ଚକଲେଟ ll

ଏପରି ଦିନେ ନାତୁଣୀ ମାନେ

  ହୁଅନ୍ତି କେତେ ଗେଲ l

ଆଣ ହେ ଜେଜ ଝଅଟ ଆଜ 

   ଗତିଟି ଯେବେ ଭଲ ll

ହଉଲୋ ରାଇ ଚକ୍ଲେଟ ଖାଇ

   ଦାନ୍ତକୁ କର ପୋକା l

ମିଳିବ ବର ଜାଣଲୋ ତୋର

  ପାକୁଆ ଏକ ଟୋକା ll