ବିଦ୍ୟାଳୟ ଖୋଲିବ
ବିଦ୍ୟାଳୟ ଖୋଲିବ
କୋଭିଡ ୧୯ ବା କରୋନାର କରୁଣାରୁ
ଦୀର୍ଘଦିନର ଗୃହବାସ ପରେ,
ବିଦ୍ୟାଳୟ ଖୋଲିବାର ଖବରକୁ ପଢି
ଏବେ ଅନେକ ସନ୍ଦେହୀ ନିଜର ଦୃଷ୍ଟିଶକ୍ତି ଉପରେ!
ପିଲାମାନେ ବିଦ୍ୟାଳୟ ଆସିବା ବାଧ୍ୟତାମୂଳକ ନୁହେଁ
କିନ୍ତୁ ଶିକ୍ଷକ ଶିକ୍ଷୟିତ୍ରୀଙ୍କୁ ଆସିଵାକୁ ପଡିବ;
ସତେ ଯେମିତି କରୋନା କେବଳ ପିଲାଙ୍କୁ ଧରି
ସମ୍ମାନ ଦୃଷ୍ଟିରୁ ଶିକ୍ଷକ ଶିକ୍ଷୟିତ୍ରୀଙ୍କୁ ଛାଡିବ!!
ଏବେ କିଛି ଟେଲର ଓ କପଡା ବ୍ୟବସାୟୀ ତ
ଅବଶ୍ୟ ଲାଭବାନ ହେବେ;
କରୋନା କରୁଣାରୁ ଉପକୃତ ଅଣ୍ଟା ନିକଟରେ ଯେବେ
ୟୁନିଫର୍ମ ପୋଷାକମାନେ ଆତ୍ମସମର୍ପଣ କରିବେ!
ଅବଶ୍ୟ ଶନି ରବିବାର ଓଗେର ଯଦି
ସତରେ ନିୟମିତ କ୍ଲାସ୍ ଚାଲିବ;
ଆପେ ଆପେ ବ୍ରଏଲର ବଡିଗୁଡା
ଦିନ କେତେଟାରେ ଦେଶୀ ପାଲଟିବ!!
ସୁସ୍ୱାଦୁ ଖାଦ୍ୟ ରନ୍ଧନ ଶିଖି ପୂର୍ବାପେକ୍ଷା
ଅଧିକ ପରିମାଣରେ ଖାଇଛନ୍ତି ଯେହୁ;
ମନେମନେ କହୁଛନ୍ତି ରବିବାର ଦିନ ବିଦ୍ୟାଳୟରେ
ଚିକେନ/ମଟନ ଝୋଳର ବ୍ୟବସ୍ଥା ହେଉ!
ଘରେ ରହିରହି ଯେଉଁ ଛାତ୍ରଛାତ୍ରୀ ଓ ଶିକ୍ଷକେ
ଦିନବେଳ ଶୟନକୁ ନୀତି କରିଛନ୍ତି;
ଦେଖାଯାଉ ସେମାନେ ପାଠ ଘୋଷୁଛନ୍ତି
ନା ଆପୋଷ ମିଳାମିଶାରେ ଘୁଙ୍ଗୁଡି ମାରୁଛନ୍ତି!
ଆଗରୁ ପିଲାଏ କମ୍ପ୍ଲେନ୍ କରୁଥିଲେ ମିସ୍
ୟେ ମୋ କପି ସିଏ ମୋ ବୁକ୍ ନେଲାଣି;
ଏବେ କହିବେ ମିସ୍ ମିସ୍ ଦେଖ
ଇଏ ମୋ ମାସ୍କ୍ ସିଏ ମୋ ସାନିଟାଇଜର୍ ନେଲାଣି!
ଶିକ୍ଷକେ ଜଗିବେ ନାହିଁ ଆଉ କାହାର ଚୁଟି ନଖ ବୃଦ୍ଧି
କିଏ ଗଲା କିଏ ଆସିଲାଣି;
ବରଂ ତଦାରଖ କରିବେ ସିଏ କାହାର
ଗଙ୍ଗା ଯମୁନା ବହିଲାଣି ଆଉ କିଏ କାଶିଲାଣି!
ଅଭିଭାବକମାନେ ଚିନ୍ତା କରନ୍ତୁ ନାହିଁ
ଅଳ୍ପଦିନର ପଢାରେ ବି ପିଲାଏ ଭଲ ମାର୍କ ରଖିବେ;
କାରଣ ପରୀକ୍ଷାର ଉତ୍ତର ଖାତା ବି ତ
କୋର୍ସ ଖତମ୍ କରିଥିବା ସେଇ ଶିକ୍ଷକମାନେ ଦେଖିବେ!!