ବିଭୁଙ୍କ ସହ ସମ୍ପର୍କ

ଆତ୍ମ ନିରୀକ୍ଷଣ କର ମାଆ ଓ ବାବୁ

ଜନ୍ମ ମୃତ୍ୟୁ ଚକ୍ରୁ ଉଦ୍ଧାର ହେବୁ,

ମାନବ ଜନ୍ମ ତୋ ସାର୍ଥକ କରିବୁ

ମନୋକାମନା ସବୁ ପୂର୍ଣ୍ଣ କରିବୁ।

ଜନ୍ମ ମୃତ୍ୟୁ ଚକ୍ରେ ତୁ ଭ୍ରମି ଭ୍ରମି

ମାତା ଗର୍ଭୁ ପଡି ଛୁଇଁଲୁ ଏ ଭୂମି,

ମାୟା ମୋହେ ଆଉ ନ ଯାଆ ଭ୍ରମି

ଶାଶ୍ୱତ ଆନନ୍ଦେ ଯାଅ ତୁ ଗମି।

କ୍ଷଣିକ ସୁଖରେ ନଯାଇ ମଜ୍ଜି

ପ୍ରଭୁ ନାମ ସଦା ସର୍ବଦା ଭଜି,

ମୃତ୍ୟୁ ପାଶେ ଅଛି, ଏ କଥା ହେଜି

ସଂସାର ହାଟରେ ନ ଯାଆ ହଜି।

ଆନ ପାଇଁ ବିତା ଜୀବନ ତୋର

ପ୍ରଭୁ ଯାଚି ଦେବେ ସୁଖ ସାଗର,

ସହଜେ ପାରି ହେବୁ ଏ ପାରାବାର

ନିତ୍ୟାନନ୍ଦ ଲଭିବୁ, ମତି ହେବ ସ୍ଥିର।

ସୁଖ ଦେଲେ ତୁହି, ଶାନ୍ତି ପାଇବୁ

ତ୍ୟାଗରେ ଆନନ୍ଦ ଲାଭ କରିବୁ,

ଭୋଗରେ ବୁଡିଲେ ମାଆ ଓ ବାବୁ

ଦୁଃଖ ସଂସାରେ, କି ସୁଖ ପାଇବୁ?

ଜୀବନ ସରୁଛି, କେବେ ହେଜିବୁ

ମାନବ ଜନ୍ମ କି ଆଉ ପାଇବୁ,

ହାଟ ସରିଗଲେ ଫେରି ତୁ ଯିବୁ

ଧର୍ମ କ୍ଷେତ୍ରେ ଆଉ କେବେ ଲଢିବୁ?

କର୍ମ କରିଯାଆ, ଈଶ୍ୱର ସ୍ମରି

ଏ ଭବ ସାଗରୁ ହୋଇବୁ ପାରି,

ଦେବଦତ୍ତ କରେ ଏହି ଗୁହାରୀ

ବିଭୁଙ୍କୁ କ୍ଷଣେ ତୁ ନ ଯା ପାଶୋରି।