ଅଧା ଲେଖା ଚିଠି

ସକାଳ ପହରୁ,

କିଛି ଖୋଜୁଖୋଜୁ

ହଠାତ୍ ଠପ୍ କିନା ପଡ଼ିଗଲା ଚିଠିଟିଏ

ଆଲମାରିର, କେଉଁ ଏକ ଅଦୃଶ୍ଯ ସହରୁ ।

ଅଜାଣତରେ ହାତ

ତା’ଆଡ଼କୁ ଚାଲିଗଲା,

ମାଟିରୁ ସାଉଁଟି ଆଣି

ଅପଲକ ନୟନେ ଚାହିଁଲି ତାକୁ।

ଅନୁଭବ କଲି

ତା'କଳେବର ଭିତରେ

ଭରି ରହିଥିବା କୋହ ଓ ଦାହକୁ ,

ଶୁଣିଲି ଭଗ୍ନାତ୍ମା ପାଣ୍ଡୁଲିପିର କରୁଣ ଚିତ୍କାରକୁ

ସତେ ଯେପରି ସେମାନେ ମୋତେ ଡାକୁଛନ୍ତି,

ତାଙ୍କର ପୂର୍ଣ୍ଣତା ସକାଶେ;

ଅପେକ୍ଷା କରିଛନ୍ତି ଅନାଦି କାଳରୁ!

କିଛିଟା ମୁହୂର୍ତ୍ତ ପାଇଁ,ଅସ୍ମିତା ହରାଇ

ମୁଁ ଚାଲିଗଲି ଏକ ଭିନ୍ନ ଦୁନିଆକୁ

ଯେଉଁଠାରେ ମୁଁ ସର୍ଜିଥିଲି ଏ ଚିଠିକୁ ।

ନୀରବିଗଲା କଲମ୍,ଅଧାରହିଗଲା ଚିଠି

ଭାଙ୍ଗିଗଲା ତାଜମହଲ,

ବୋମା ବିସ୍ପୋରଣରେ !