बायकोचा वाढदिवस...

बायकोचा वाढदिवस लक्षात राहिला तर तो अत्यंत महत्वाचा दिवस. सर्वार्थाने लक्षात राहिला तर झोपमोड १००%, नाही लक्षात राहिला तर हिरमोड १००%. जणू दुधारी तलवार. कोणत्याही परिस्थितीत इजा करणारी. पण खरं सांगू यातून वाचण्याचा उपाय मला काल तिच्या वाढदिवसाच्या दिवशी सापडला. अगदी साधा सोपा उपाय. मला वाटत बऱ्याच विवाहितांना थोड्याफार प्रमाणात उपयोगी पडेल, असं वाटत म्हणून हा शब्दप्रपंच.

खरं म्हणजे तिचा वाढदिवस आपल्या लक्षात न राहणं यातच तिचा खरा आनंद दडलेला असतो, आपला नवरा बिनडोक, साधाभोळा, विसराळू आणि अनेक टाकाऊ गुणांनी संपन्न नवरा लाभलेला आहे हा तिच्या आनंदाचा प्लसपॉईंट असतो. सकाळी सकाळी किंवा अगदीच आनंदात रात्री बारालाच वाढदिवसाच्या शुभेच्छा दिल्या की, सारा दिवस मोकळामोकळा सरतो, तिला त्या दिवसाची जाणीवच रहात नाही. पण आपण विसरलो किंवा दुर्लक्ष केले गेले की तिच्या मनात सारखा विचार चालू राहतो. माघारी सर्व बिरुद लावून उद्धार होतो आणि आपलं वेटेज वाढतं.

सरप्राईज वगैरेमध्ये काही दम नाही. शेवटी संयमाचा बांध फुटतो मग जी मजा येते ती औरच. आपली अनुपस्थिती जेव्हा उपस्थिती होते तेव्हाच खरे मोल ठरते. म्हणून गडबड जरून कधी वाढदिवसाच्या शुभेच्छा देण्याच्या फंदात पडायचं नाही, सावकाश शुभेच्छा देऊन वाढदिवस साजरा करण्याने निदान पुढच्या वर्षी तरी लक्षात ठेवा म्हणून बोळवण होते आणि दिवस सौख्यमय होतो यात शंका नाही. आपलं हसं होणं यातच तिच्या वाढदिवसाचे सुख सामावलेले असते हे पक्कं लक्षात ठेवावं हेच चांगलं.

हे दोनचार शब्द लिहिण्यामागचा हेतू इतकाच की अर्धांगिनीचा वाढदिवस हा अविस्मरणीय व्हावा इतकंच..!