ओंजळभर का होईना

इल्या आमचा एकदम भारी

त्याला आहे एकच छंद ।

झोपेत पण ओळखेल हो

कोऱ्या नोटांचा गंध ।

हुंदडेल तिथेच हादडेल

पैश्या मध्ये होतो धुंद ।

असू द्या ना म्हणतो

कितीही कशाचे निर्बंध ।

गती कामाची तुमच्या

करा ना थोडीशी मंद ।

पैसेच पैसे येतील म्हणे

फक्त मार्ग असू द्या रुंद ।

नाक दाबून तोंड उघडा

नाहीतर खात बसा कंद ।

मार पडला की म्हणे

कोणीही होतो बेधुंद ।

पकडून त्याला मग

करा पूर्ण आपला छंद ।

नोटा घेताना कोऱ्या

डोळे थोडे ठेवा बंद ।

करप्शनच्या मुद्द्यावर

सगळेच होतात अंध ।

घेऊन बघा ना पैसे

मिळतो किती आनंद ।

पैसा कसाही असो

सारखाच असतो गंध ।

ओंजळभर का होईना

करायचा असाच प्रबंध ।

आयुष्यभर मग आपले

लिहीत बसा निबंध ।