नातं तुझं-माझं

आकाश अन् धरणीचं 

तुझं-माझं नातं,

जरी दिसतो वेगळे

एक प्राण एक ज्योत!

चार डोळे-तुझे माझे 

क्षण एकच जपती,

हात कोणते सांग दारी 

लावती सांजवाती!

तुझ्या-माझ्या हृदयात 

घर दोघांचे सजले,

तुझ्या डोळ्यातले थेंब 

गाली माझ्या ओघळले!

तुझ्या मुखातून मी

घास मला भरवते,

तुझ्या-माझ्या अंतरात 

मन एकच खेळते!

तुझी-माझी सावली

तुझ्या कधी माझ्या संगे,

तुझी-माझी प्रित सख्या 

डाव आयुष्याचा रंगे!