कविता अशी साकारते

डोक्यात असते कल्पना 

कल्पनेला येतो आकार 

शब्दाला शब्द जुळत जातो 

अन् कविता घेते आकार ||१

स्थान नसतं ठरलेलं 

विषयही नसतो ठरलेला 

अनेक विचारांच्या काहुराने 

मनाचा घडा असतो भरलेला ||२

कुठला विषय डोकावेल 

कवीलाही नसते कल्पना 

विषयानुसार काव्य करण्यास 

सांगता येत नाही स्वमना ||३

कवी असतो मानी 

खपवून घेत नाही गुलामी 

कलाकलाने कवीला खुलवायला

करावी लागते युक्ती नामी ||४

कुठल्याही कवीला विचारा 

किती घालतो येरझारा 

कधी तरीच पाझरतो 

कवीच्या प्रतिभेचा मुक्त झरा ||५