कथा

कोसळू देत दरडी नि ओसांडू देत नद्या

गावच्या गावं जलमय होईपर्यंत

माणसे नि जनावरे सगळंच निपचित

भगवे असू देत किंवा मग हिरवे

निसर्गाच्या डावात सगळेच अभिमृष्ट

डझनभर खपू देत किंवा मग शे पाचशे 

सामान्य माणसाच्या मृत्यूची 

कहानीही फुटकळ च म्हणायची

कथा तर असामान्यांची होत असते!

मग बुडू देत का बोट अजून एखादी?

पण तेच ते काळे बरबटलेले कृश 

हडकुळे नि हतबल चेहरे नकोत यावेळी

धष्टपुष्ट नि सत्तेने उन्मत्त झालेले 

रुबाबदार चेहरे जरा कमीच सापडतील

दोनशे अठ्ठ्याऐंशी किंवा मग पाचशे त्रेचाळीस?

निसर्गा, बघ तुझ्या नियमात बसतंय का

नाही तर, घे की एकदा टेबलाखालून

कथा मात्र एक नंबर होईल.. अगदी अविस्मरणीय!

(288- महाराष्ट्र विधानसभा आमदार संख्या

543- लोकसभा खासदार संख्या)