हे सांजनभाचे देणे

हे सांजनभाचे देणे

नितळ निळाई डोळी

त्या जास्वंदी ओठांवर

भाळते संध्या भोळी

 

ते निळे तुझेच डोळे

अन जलाशयाची कांती

का थेंबांवरती उतरे

त्या श्रावणातील राती

 

ते पाण्यावरती संथ

येई चिंब तरंग

ती खळी तुझ्या गालावर

लेऊन सांजचे रंग

 

तू सांज बावरी अवघी

अन चिंब चिंब भिजलेली

तू जाता अंधारेल

हि सांज इथे थिजलेली

 

डोळ्यात येई घनगर्द

दाटून तुझा हा अबोला

तू जाऊ नको ना सखये

मी उरतो निळसर ओला