चांदरात
चांदरात
अंबरास चांदण्यांचा सहवास करी धुंद
तेजाळली चांदरात निथळून येई मंद
रानोपानी ठायीठायी चंद्र उतरला बाई
सजणाच्या सोबतीनं अंधाराला जाग येई
फुलापानी कुजबुज दाटून ही आली लाज
नजरेनं नजरेची भाषा ओळखली आज
पेटलं वेड तुफान शहारलं रान सारं
उरी दाटल्या उधाणा जाणिवांची ग किनार
ओठांवर कबुलीस ओठांनीच कैद केलं
गुलाबी उधळण रानी गात्र गात्र मोहरलं
पाचोळ्याची कुरबूर बावरली रानवेल
काजव्यांच्या प्रकाशात दिसे केवडा नितळ
पहाटे पहाटे येई रानी मोगरा बहर
अडकूनी मिठीमध्ये झाला मधाळ प्रहर
झुंजूमुंजू होता दिशा रान भानावर आलं
उतरल्या चंद्रालाही मिठीच अडवी कोडं..