बदलत गेली आई
बदलत गेली आई
बाबा गेल्या पासून
आई 'आई' राहिलीच नव्हती
बदलत गेली आई..
ओढायची जपमाळ
दिवसातून कितीदा तरी..
दोन चिमटीत धरुन
काढायची रांगोळी
मनाजोगती येत नाही तोपर्यंत..
चेहरा धुऊन झाला की
सवयी नुसार जायचा हात
तिचा दोन भुवया मध्ये
कुंकूवाच्या जागेवर...
कुंकवानं जागा सोडली
उशीरानं जाणवायचं तिला...
कोरभर भाकर चघळत
रहायची बळंबळं
घास ढकलायची पोटात
कसातरी...
डोळे टक्क उघडे ठेवून
झोपायची कूस बदलत..
मोजायची बोटांवर
रोज रात्री काही तरी...
काय मोजत होती ती?
आयुष्यातले शिल्लक दिवस
की...
बाबांना भेटण्याचा क्षण...