आठवणी.
आठवणी.
आठवणी
ढग जमता आभाळी
आठवांना येई पूर
आत बाहेर भिजवी
बाई पाऊस खट्याळ
गेले उडून शैशव
दूर राहीले माहेर
अंगणात थेंब थेंब
जीवा करीती विभोर
दिसे गावचे देऊळ
भिजलेली शेतीवाडी
डबक्यात सोडलेली
साद घाली निळी होडी
काचेवर खिडकीच्या
हळू ओघळती धार
चित्त करी सैरभैर
दिसे कॉलेजचा पार
झिम्म जोरदार सर..
त्याचा भिजलेला खांदा
गंध त्याच्या अत्तराचा
घालू लागे मनी पिंगा
धुंद चंदेरी पाऊस
आडदांड धुसमुळा
अंग अंग रोमांचित
स्पर्श रेंगाळे आगळा
आणि पाऊस कहर
डुबलेले घरदार
माझ्या शहराने मुकाट
सोसलेला हाहाकार
भल्या बुर्या आठवणी
येती दाटून अशाच
प्रतिवर्षी जेव्हा होतं
आगमन पावसाचं, आगमन पावसाचं....