ದೀಪದ ಬೆಳಕು

ಮನೆಯ ತುಂಬೆಲ್ಲಾ ಹಚ್ಚಬೇಕಿಲ್ಲ ಹಣತೆ

ಮನದ ತುಂಬಾ ಬೆಳಗಬೇಕಿದೆ ಮಮತೆ

ಕಿಚ್ಚನು ಹಚ್ಚಿ ಉಳಿಯಬೇಕಿಲ್ಲ ಜಗದಲಿ

ಚುಚ್ಚುವ ಮಾತನು ಆಡದಿರಿಂದು ನಗುತಲಿ

ರಂಗು ರಂಗಿನ ಬಣ್ಣ ಬೇಕಿಲ್ಲ ಅಂಗಳದಲಿ

ರಂಗಾದ ಕನಸುಗಳು ತುಂಬುತಿರಿ ಪರರಲಿ

ಅಸೂಯೆಯ ಅಂಧಕಾರದಲಿ ಮುಳುಗದಿರಿ

ಹಿಂಸೆಯ ಮಾಡುತಲಿ ಜೀವನವ ಕಳೆಯದಿರಿ

ಅಳಿಸುವದಾದರೆ ಅಜ್ಞಾನದ ಕತ್ತಲೆ ಅಳಿಸಿಬಿಡಿ

ತುಳಿದು ಬದುಕುವ ಕನಸನಿಂದು ತೊರೆದುಬಿಡಿ

ಬೆಳಗುವ ದೀಪಕ್ಕಿಂದು ಒಲವ ತೈಲ ಬೆರೆಸಿಬಿಡಿ

ಹೊಳೆಯುವ ಕಂಗಳಲಿ ಭರವಸೆಯಾಗಿದ್ದುಬಿಡಿ

ಸಂಕಷ್ಟವೆಂಬ ಸಾಗರವ ದಾಟಿ ಸಾಗಬೇಕಿಂದು

ನಷ್ಟದ ದಿನಗಳನು ಮರೆತು ಬೆಳೆಯಬೇಕಿಂದು

ಶಪಿಸದಿರಿ ಬಾಳಲಿ ಪರರ ಏಳಿಗೆಯ ಕಂಡಿಂದು

ದೀಪದಂತೆ ಪ್ರಜ್ವಲಿಸಲಿ ನಮ್ಮಯ ಬದುಕಿಂದು