Kagaz ki naav

Kagaz Ki Naav

By PATEL RJ

Manikarnika pe maut kabhi chhutti nahi leti.

Log kehte hain yahan Chita ki aag me bhi thandak hai, kyuki yahan sabko mukti milti hai.

Vaha hawa me raakh hai, paani me prathna hai, aur har kone me ek kahani jal rahi hai.

Manikarnika ke baad wahan, shiv baithta tha, tokri me safed kagaz liye.

Log kehte hain yahan sab khatam hota hai,

Par shiv jaanta tha, yahan sirf jism jalte hain, ichchayein toh ganga me behna abhi baaki hain.

Us ghaat ke sabse kone me shiv baithta tha. Umar 29, par aankhein 90 saal ki lagti thi.

Samne tokri me safed kagaz, haath me fevicol, aur aankhon me ek ajeeb si shaanti.

Har koi apno ko jalane aata tha, shiv unki adhuri ichhaon ko jalane se bachane aata tha.

Wo kagaz ki naav banata tha aur Ganga me chhod deta tha.

Log aate, apne mare hue pita, maa, bhai ke naam ka kagaz usko dete. Uspe ek adhuri ichha likhi hoti - maa Kedar jana chahti thi, baba ko ek baar samundar dekhna tha.

Shiv us kagaz ki naav banata aur Ganga me chhod deta. Yahan adhuri reh gayi, wo Ganga usko aage le jayegi.

Ek shaam ek ladki aayi- Anya.

Haath me ek hi geela kagaz, jaise bahut der tak muthi me pakda ho.

Chehre pe thakan kaanpte hue aksharon me likha tha

"Main jeena chahti hu."

Shiv ne us kagaz ko dekha.

Pehli baar kisi Zinda insaan ki ichha uske haath me aayi thi.

Usne kaha "Ye ghaat Marne walon ka hai. Jeene ki naav yahan nahi banti. Manikarnika pe log mukti maangte hain, zindagi nahi."

Anya boli - toh zindagi Kahan milti hai?

Wo aankhein maut se nahi Dari hui thi, wo toh zindagi se naaraz thi,

Ki usne itni jaldi janae ko kyun kaha.

Toh zindagi Kahan milti hai?

Kya un Kitaabon me jo ghaat pe bikti hain?

Ya us chai me jo bina Darr pee jaati hai?

Zindagi toh wahi milti hai,

Jahan koi tumhare liye,

Subah 4 baje uth kar, ek khali kagaz liye baitha ho.

Shiv ne pehli baar uski aankhon me dekha. Wahan maut ka dar nahi tha, jeene ki zidd thi.

Shiv bola, Assi pe, kal subah 4 baje aana.

Agale din se roz assi pe ek nayi naav banti. Subah 4 baje, jab poora Banaras so Raha hota, Assi pe sirf do log hote- ek jo maut se bhaag kar aaya tha, aur ek jo zindagi se bhaag Raha tha.

Anya apni choti ichchayein likhti thi jo sabke liye normal thi, par uske liye bahut badi.

Ek din Anya likhti - Aaj Bina Darr chai peeni hai.

Kabhi likhti - Aaj ghaat pe jor se hasna hai.

Kabhi - Aaj kisi anjaan ko thank you bolna hai.

Kuch log jeene ke liye badi wajah dhundte hain.

Aur kuch ek chai ki chuski me hi jeena seekh jaate hain.

Anya un dusri wali me se thi, Jiske liye har choti saans bhi ek tyohaar thi.

Tum in mare hue logon ki ichhaon ko itne pyaar se kyun banate ho?

Shiv kehta - Kyunki zinda log apni ichhaon ko halke me le lete hain. Marne ke baad hi samajh aata hai ki jeena kitna keemti tha.

Ek din Anya nahi aayi. Do din, teen din, chauthe din shiv ka dil ghabrane laga.

Usne apni tokri uthayi aur pehli baar manikarnika ke bahar kadam rakha.

Ek din Anya ne pucha- Tumne kabhi apne liye naav kyu nahi banayi?

Shiv ne ret pe lakeer kheench kar bola- Apni ichchha likhoge toh umeed ban jayegi Aur umeed Chita se bhi zyada jalati hai.

Anya hansi - par umeed hi toh ek aisi cheez hai jo jal ke bhi bujhti nahi.

Jal jaane do...

Kyunki umeed hi toh ek aisi cheez hai,

Jo jal ke bhi bujhti nahi,

Wo toh raakh se bhi ug aati hai.

Manikarnika pe sab jalta hai,

Par umeed toh us rakh me bhi zinda rehti hai.

Dheere dheere Anya ki list khatam hone lagi, par uski saansein aur bhaari hone lagi.

Doctor ne operation ki date de di thi.

Aakhiri din se ek din pehle wo 9 kagaz leke aayi. 9 alag-alag ichchayein.

Shiv ne 9 naavein banayi, par 10vi naav sabse bhari thi.

Uspe likha tha - kisi ko itna pyaar karna ki marne se darr lage.

Shiv ka dil baith gaya.

Usne 4 saal me hazar naavein banayi thi, par aisi ichha pehli baar dekhi thi.

Kisi ko itna pyaar karna, ki marne se darr lage, Anya ne likha toh tha ek line, Par shiv ne usme apni poori Umar padh li.

Shiv bola - ye ichha naav se nahi, saans se poori hoti hai.

Anya boli- toh saans do na.

Agle din Anya nahi aayi. Agle din bhi nahi, teesre din shiv ki tokri khaali reh gayi.

Chauthe din assi ke chai Wale ne bola- Woh BHU wali ladki... Kal raat se admit hai. Dil wala ward.

Shiv dauda. Zindagi me pehli baar manikarnika se bhaga.

BHU ke bed no. 14 pe Anya thi. Peeli, thandi, par hosh me, Usne shiv ko dekh ke kaha. 10vi poori hui kya?

Shiv ne uska haath pakada, Jo barf jaisa tha.

Anya boli - ab tak Marne se darti thi, ab tumhe chhod ke jaane se dar lag raha hai. Ye Darr pyaar hai naa?

Pehle darti thi ki zindagi chheen jayegi, Ab Darr lagta hai ki tum kahin chhod na jao,

Doctor ne kaha dil me ched hai, Par dard toh ab dil ke bahar ho raha hai.

Shiv ne jab se ek naya kagaz nikala, Uspe likha 11vi ichha -

Shiv ke saath assi pe ek aur chai peeni hai, aur usko uski muthi me de diya.

Operation 8 ghante ka tha.

8 ghante shiv ne BHU ke bahar, Ganga kinare Kya kiya, Koi nahi jaanta.

Usne 108 naavein banayi. Har ek pe ek hi line - Anya ko jeena hai.

Usne ek bhi tokri me nahi rakhi. Sab ek saath baha di.

Kehte hain us din assi pe ganga ka paani safed ho gaya tha kagaz se.

8 ghante baad doctor bahar aaya- Bach gayi. Chamatkar hai.

Us raat shiv ne apni 4 saal purani, sambhal ke rakhi hui 300 naavein bhi baha di. Jo usne kabhi bahayi nahi thi.

Poori ganga safed sabse aage Anya ki naav - jeena hai, uske peeche shiv ki - uske saath jeena hai.

Sabko laga kahani khatam, par kahani toh yahan se shuru hai.

10 din baad Anya ko cabin me bulaya gaya.

Doctor ne file dekhi aur bola tumhara dil ekdam theek hai. Tum 100 saal jeeogi.

Anya khush hone ki jagah sunn ho gayi. Jis bimari ne zindagi di thi, uske theek hone se dar lag raha tha.

Theek ho gayi toh, Kahin wo 4 baje wala ladka bhi theek naa samajh ke chala jaye.

Usne socha - Agar maine shiv ko bola ki main theek hu, wo kyu aayega? Woh toh meri bimaari ki naavein banata tha.

Usne shiv ko sach nahi bataya. Ek mahina, do mahina, ek saal natak kiya.

Anya BHU me professor ban gayi. Ab wo assi pe 4 baje nahi, 6 baje aati. Kabhi kabhi kehti, class thi.

Shiv ko lagne laga shayad ab uski zarurat nahi hai.

Wo pehle zindagi maangne aati thi, Ab zindagi Dene me busy ho gayi, Aur shiv wahi khada raha, Ek khaali tokri liye, 4 baje wali chai ka intezaar karta hua.

Ek din Anya 3 din nahi aayi. Shiv se raha nahi gaya. Wo BHU gaya.

Khidki se dekha - Anya mic pe 200 bachhon ko padha Rahi hai. Safed kurti me, itni khoobsurat ki shiv pehchan hi nahi paya.

Jo ladki kabhi Bina Darr chai peena likhti thi, aaj 200 log usee jeena seekh rahe the.

Lecture ke baad Anya ne usee bahar dekha aur gusse me boli- Yahan kyu aate? Sab dekh rahe hain. Ab muhje naav ki zarurat nahi, main theek hu.

Shiv ne jeb se wahi pehla geela kagaz nikala, jo usne ek saal se taabiz ki tarah sambhal ke rakha tha. "Me jeena chahti hu."

Bola - Iska kya karu?

Anya ne cheen ke phaad diya - phaad do, ab zarurat nahi.

Shiv raat bhar assi pe baitha raha. Pehli baar apne liye naav banayi- Main akela nahi rehna chahta, Aur wo naav... Doob gayi, Kyunki sach bhaari hota hai.

Joothe naam ki naav toh beh jaati hai,

Par saachi aksar doob jaati hai,

Kyunki ganga bhi sach ka bojh nahi uthaa paati.

Agli subah 4 baje, Anya uski jhopdi pe aayi, Haath me nayi tokri, par is baar kagaz safed nahi, neele the.

Usme ek hi kagaz tha.

Main Anya, jhooth bolti thi.

Mujhe koi bimari nahi thi.

Par maine bataya nahi kyunki laga tum chale jaoge.

Tum meri bimari se pyaar karte ho, mujhse nahi.

Maaf kar doge toh aakhri ichha.

Main Anya, shiv ke saath buddhi hona chahti hu.

Ye ichha Marne Wale ki nahi, jeene Wale ki hai.

Shiv ne wo kagaz naav nahi banaya.

Usne usko almari me rakh diya, jahan uske pitaji ka Holi wala kagaz rakha tha.

Bola -

Kuch kagaz naav nahi bante, kuch ghar bante hain.

Kuch kagaz ganga me nahi bahate,

Wo almari me rakhe jaate hain,

Kyunki kuch ichchayein mukti nahi maangti,

Wo toh zindagi bhar saath rehne ka wada Maangti hain.

Fir dono ne milke manikarnika pe ek lakdi ka board lagaya- Yahan adhuri ichha likhi, naav ham banayenge.

Pehle din 10 kagaz aaye, dusre din 100, teesre din 1000.

Shiv - Anya ne poori raat 1000 naavein banayi subah 4 baje assi se manikarnika tak poori ganga safed ho gayi.

2 ghante tak kisi ki Chita nahi jali, sab ghaat pe khade hoke naavein dekh rahe the.

Sabse aage do naavein Ek dhage se bandhi hui thi.

Main jeena chahti hu- Anya

Main uske saath jeena chahta hu - shiv.

Kehta hain wo do naavein Aaj bhi subah 4 baje assi pe dikhti hain, kabhi doobti nahi.

Kyunki kuch ichchayein mukti se badi hoti hain.

Kuch kagaz ki naavein Ganga me nahi behti, ghar ban jaati hain.

_ samapt -

PATEL RJ