સમાજ કલ્યાણ

"બાળ મજૂરી એ આપણાં સમાજ માટે એક લાંછનરૂપ સમસ્યા છે. ભણવાની અને રમવાની ઉંમરે કમાવાની જવાબદારીનાં બોજ તળે બચપણને કચડી નાખવું એ ખરેખર પાપ છે. આપણે જો "મારે શું ?"ની માનસિકતામાંથી બહાર આવીને સમાજ કલ્યાણ દિશામાં આપણું કોઈ નક્કર યોગદાન આપી શકીશું તો જ સાચા અર્થમાં બાળ મજૂરી નિષેધ દિન ઉજવ્યો ગણાશે." 

તાળીઓનાં ગડગડાટથી શિવાની અગ્રવાલનું આ વક્તવ્ય વધાવી લેવાયું. જાણીતા લેખિકા અને સમાજસેવિકા સૌનું અભિવાદન ઝીલી પોતાની કારમાં ગોઠવાયા. સાંજે બે જગ્યાએ આ દિવસનાં ઉપલક્ષ્યમાં યોજાયેલ કાર્યક્રમનાં ભાષણનાં બીજા ધારદાર શબ્દો મોબાઈલમાં તૈયાર કર્યાં. 

ઘરે આવ્યાં ત્યારે તેમની કામવાળી બાઈ શબનમની બાર વર્ષની દીકરી રુખસાના રોજની જેમ ઝાડુ-પોતાં કરી રહી હતી. 

બંગલામાં મુખ્ય દરવાજેથી જ શિવાનીબેને બોલવાનું શરૂ કર્યું. 

"જો રુખી, સરખું પોતું મારજે. તારો જીવ કામમાં હોતો જ નથી. જો મને લાદીમાં એક પણ જગ્યાએ લિસોટા દેખાયા તો હું બીજીવાર પોતા મરાવીશ, ને પરીક્ષાનાં નામે ખોટી રજા લઈશ તો પગાર કાપી લઈશ. સમજી ગઈ ?"