ફ્રેન્ડશીપ ડે સ્પેશ્યલ

આજે ૧ઓગસ્ટ ફ્રેન્ડશીપ ડે એટલે સવારથી બધાના ફોનમાં મેસેજ આવવાના ચાલુ થઈ ગયા હશે, જે લોકોને મળવાનો સમય પણ નથી એવા મિત્રો પણ આજે ફ્રેન્ડશીપ ડે પર વિશ કરશે, કેટલાક જૂના ભૂલાઈ ગયેલા, કે દૂર થયેલા મિત્રોની ફરી એકવાર યાદ આવશે. કેટલાય ક્વોટ અને મેસેજ હશે. ક્યાંક જૂના મિત્રોની યાદ હશે તો ક્યાંક નવી મિત્રતાની ઉજવણી થશે. પણ હું તો માનું છુ કે મિત્રો દૂધમાં ભળતી સાકર જેવા હોય છે જે આપણી મીઠી જિંદગીમાં વધારે મીઠાશ ભરે., મિત્રો એ બીમારીમાં મળતી કડવી દવા જેવો હોય છે જો ખોટા રસ્તે જતા હોઈએ તો આપણને ટોકે અને ક્યારેક એક જાપટ પણ મારી દે. પણ આતો આપણા જીવનમાં આવતા વ્યક્તિઓની વાત થઈ પરંતુ શું ક્યારેય વિચાર્યું છે કે આપણી આસપાસની નિર્જીવ વસ્તુઓ પણ આપણી સાથે કેટલી ઊંડી આત્મીયતાથી જોડાયેલી છે. જેમ કે ઇયર ફોન. હા.

 ઇયર ફોન જે આપણે બધા વાપરીએ છીએ, યાદ કરો કેટલો ઉપયોગ કરીએ છીએ એનો ? કોઈ સવારે પાંચ વાગ્યે એણે કાનમાં નાંખે અને કોઈ રાતે બાર વાગે. ક્યારેક ઊંઘ ન આવતી હોય તો અને ક્યાંક બહાર ગયા હોય તો અડધી રાત્રે પણ એણે કાનમાં ભરાવી ને બેસી જવાનું. પાછા ગીતો પણ આપણા મૂડ પ્રમાણે વગાડવાના આપણે ખુશ હોય તો પ્રેમના રોમેન્ટિક ગીતો અને આપણે જો દુઃખી હોઈએ, મનમાં કઈ વાત ખટકતી હોય તો ? તો એણે પણ દુઃખી ગીતો સાંભળવા પડે. આપણે પ્રેમમાં હોઈએ તો તો વાંધો નહિ પણ જો કમનસીબે આપણું બ્રેક અપ થઈ ગયું હોય તો ? તો તો બિચારા ઇયર ફોનને પણ દુઃખી આત્મા બની ને રહેવું પડે.

આખો દિવસ દુઃખી ગીતો સાંભળવા પડે એણે. સૌથી મોટી વાત જે વર્તન આપણે એની સાથે કરીએ તે કેમ ભૂલાય, ક્યારેક ઉતાવળમાં ઈયારફોન કેવી રીતે ગૂંચળું કરીને મૂકીએ છીએ ખબર હશે બધાને. શું આપણા આ નખરા કોઈ વ્યક્તિ સહન કરે ? અડધી રાતે ફોન કરીએ તો પહેલા કહેશે શું અલા ..આટલા મોડા શું કામ ઊંઘ બગડે ? ને જો ત્યારે એમ કીધુ હોય કે એ તો હું બહાર જાવ છું બસ માં ટાઇમપાસ કરવા જ ફોન કર્યો તો.. તો વિચારો પેલો સામે વાળો શું શું બોલશે તમને. તો શું આ ઇયર ફોન ને આજે ફ્રેન્ડશીપ પર વિશ્ ન કરવું જોઈએ ?

બીજી નિર્જીવ વસ્તુ જે બધા જ વાપરે છે જે આપણે રાતે સૂતી વખતે ઉપયોગમાં લઇએ છીએ.. સમજાઈ ગયું હશે ? હા આપણા માથાની નીચે ટેકો આપતું ઓશીકું  અને એની જોડીદાર એટલે રજાઈ જે ઠંડીમાં કામ આવે.

આ ઓશીકું જે માથા નીચે ટેકો આપે છે યાદ કરો એણે તમારી કેટલી લાગણીઓને પણ ટેકો આપ્યો છે ? તમારા દુઃખ એણે સાંભળ્યા છે. તમારી ખુશીમાં ભલે તમે યાદ ના કરો પણ તમારા દરેક માં જ્યારે તમારી આંખો ભીંજાઈ અને જ્યારે આંસુ પડ્યા તો એ ઓશિકા એ પોતાના ખભા પર ઝીલ્યા છે. ખુશી માં તો ભાગ્યે જ એને સાથે રખીએ, પ્રેમમાં હોઈએ અને જ્યારે એ વ્યક્તિની યાદ આવે તો કદાચ હગ કરવા બસ..એટલી જ ખુશી એના નસીબમાં હોય. પણ જ્યારે એ પ્રેમ છોડી જાય કે ઝગડો થાય, ને આંસુ વહે, કે પછી કોઈ મિત્ર સાથે ઝગડ્યા હોય કે ઘરે કોઈ સાથે બોલાબોલી થઈ હોય અને જે આંસુ વહે એ બધા આંસુ ઓશિકા એ પોતાના પર ઝીલી આપણને સહારો આપ્યો છે. બસ રજાઈ પણ એની જ સાથી છે નાના ભાઈ બહેન સાથે મસ્તી કરતા કરતા એણે ફાડી દઈએ, ઊંઘમાં પડખું ફેરવતા એણે પણ કેટલીવાર ફેરવીએ, હા..જ્યારે કોઈ સમવન સ્પેશિયલ સાથે રાત્રે વાત કરવી હોય ત્યારે તો એની જ ઢાલ બનાવીએ ખરું ને ? ક્યારેક રડતા કોઈ જોઈ ન લે એટલે એણે મોઢા પર ઓઢી લઈએ.

તો શું એ આપણા મિત્ર ન કહેવાય ? એ બધા ને પણ આજે વિશ કરવું જોઈએ ને? હેપ્પી ફ્રન્ડશીપ ડે મારા ઇયર ફોન, મારી રજાઈ અને ઓશિકા અમારી લાગણીઓને પોતાની જાતમાં સમાવી લેવા આભાર.