વિચારોનો પ્રવાહ

વિચારોનો પ્રવાહ મને લાગે છે

એકદમ નદી સરીખો,

ક્યારેક શાંત વિશાળ મેદાને

એ ગંભીરતાથી ઘૂઘવતો,

તો ક્યારેક પ્રચંડ ધોધ સમો એ

મગજમાં અહીં તહીં અફળાતો,

ક્યારેક કલકલ કરતાં ઝરણાં સમો

એ અવનવાં વિચારો ખીલવતો,

ને ક્યારેક વળી ખળખળ વહી

ખુશનુમા ખ્યાલોની સુગંધને પ્રસરાવતો,

વળી કો'ક દિ' ઘોડાપૂર સમો

બધી સીમાઓને પડકારતો,

સમાજના દરેક બંધનોને એ નકારતો

ક્યારેક લાગણીઓના દુકાળે,

પોતાને અંદરથી જ સૂકવી નાંખતો,

ક્યારેક બાષ્પ થઈ વાદળીઓ રૂપે

મનમાં સ્નેહ એ વરસાવતો,

બસ એક જ અલગતા આ 

પ્રવાહોની સરખામણીમાં,

નદીઓનો પ્રવાહ તો ઉદ્દગમ ભણી

ક્યારેય પાછો નથી વળતો,

પણ વિચારોનો પ્રવાહ તો 

ભૂત,ભવિષ્ય ને વર્તમાન ત્રણેય

કાળમાં રખડતો !