રંગવા લાગે છે !
રંગવા લાગે છે !
એક રંગારો લઈ રંગોને, સૌને રંગવા લાગે છે
ભીતર ભરી છે શુષ્કતા, ને સૌને ભીંજવવા લાગે છે,
કેટલાંય રંગોથી રંગી લ્યો, આ આલિશાન મહેલો, પણ
મહીં ઝૂલતો ખાલીપો, છતાંય ડંખવા લાગે છે,
ઠેર ઠેર આ ધરા પર, વેરાયા છે રંગો વસંતના
પાનખરની ભાળ મળે, આ રંગો પણ ઓસરવા લાગે છે,
ઘરડાં થવાનું છે ભૂલીને, તું જુવાનીના રંગે રંગાય છે
કળ વળે જ્યારે જિંદગીની, ને જુવાની ઢળવા લાગે છે,
લીલી છે ઘટાઓ, એટલે જ અભેદ્ય છે 'ચિરાગ'
શુષ્કતાથી ભીંજાયેલ સઘળું, ભડકે બળવા લાગે છે.