રેખા

જો પ્રણયનાં નામની આ હાથમાં અંકાય રેખા,

ભૂંસવા ચાહો છતાંયે ના પછી ભૂંસાય રેખા.

ભાગ્યરેખાઓ હથેળીમાં નથી હોતી પ્રથમથી,

કર્મ રૂપી અંકણી ચાલે પછી દોરાય રેખા,

એક રીતે જોઈએ તો ચિત્રમાં લીટા જ છે બસ,

આંખ રેખામય બને તો આ બધી વંચાય રેખા.

આ સીમારેખા ભલે બાંધો તમે સરહદ ઉપરની,

ધ્યાન રાખો કે દિલો વચ્ચે ન ઉભી થાય રેખા.

પ્રેમનાં શાશ્વતપણાંનો એક આ પણ છે પુરાવો,

નામ સાંભળતાં 'અમિત'નું જો હજી શરમાય 'રેખા'