બસ એ જ

રોજ રોજ નહીં, આવશ્યકતા એ હાજર રહું - બસ એ જ,

રોક ટોક નહીં, જોઈતી ટેક કરું - બસ એ જ !

કે તારો પૂર્ણતઃ ભાર તો નહીં લઈ શકું,

તને ખભાનો આધાર આપું - બસ એ જ !

ને તારી આંખોની ભીનાશ પાછી ન વાળી શકું,

ધરું અંજલિને ઝીલી લઉં - બસ એ જ !

હા બધું ક્યાં કહેવાય ને પુછાય છે અહીં,

તારા મૌનના આસારને સમજી શકું - બસ એ જ !

કેડી રસ્તો પથ ભિન્ન હોય છે પ્રત્યેકના,

અવાય જ્યાં સુધી ત્યાં સુધી આવું - બસ એ જ !

ઉતાર ચઢાવ ભાવ પ્રભાવના સમય મધ્યે,

તારો હાથ પકડી કહી શકું કે હું છું ને - બસ એ જ !

એનો જ આપેલો છે આ અહેસાસ ને અવકાશ,

હું માણસ છું તો પહેલા માણસ થઈ ને રહું - બસ એ જ !