చీకటి దాచలేని కళ్లు

కొన్ని కళ్లు చీకటిని నిజంగా దాచలేవు
కళ్లలోని మెరుపులు ఎన్నడూ ఆగలేవు
చూపులతో చెప్పే మదిలోని ఊసులు
మౌనంలోనూ పలికే నయనాల భాషలు

కళ్లలో మెరిసేవే నిజమైన చిరునవ్వులు
పెదవులపై లేనివి చెప్పే కంటి పలుకులు
ఏ బాధైనా, ఏ భావమైనా కళ్లే నిజ సాక్ష్యం
మనసు స్పందనకు మొదటి ప్రతిబింబం

మనసు విరిగిన చోట కళ్లే సమాధానం
గుండె గాయానికి కన్నీరే అసలైన సాక్ష్యం
కళ్లలో దాగిన ఎన్నో జ్ఞాపకాల నీడలు
మదిలో చీకటైనా చిమ్మే వెలుగు కిరణాలు

గుండె భారాన్ని మోసేది ఈ రెండు కళ్లు
వేదనకు మిగిలేది వాటి తడి జాడలు
నమ్మకానికి చిరునామా నిర్మల చూపులు
ఆప్యాయతకు ఆలవాలం ప్రేమ నయనాలు

చీకటిని దాచలేని కళ్లు వెలిగే దివిటీలు
నిరాశ, నిస్పృహను చీల్చే ఆశల జ్యోతులు
దూరమైన ప్రేమలకు మౌన ప్రతిరూపాలు
ఆత్మీయ బంధాలకు శాశ్వత జ్ఞాపకాలు

కళ్లను చదివితే కనిపించేది మనిషితనం
కళ్లలో దాగేది వ్యక్తిత్వ బహు సున్నితత్వం
ప్రతి చూపు వెనుక కదిలే జీవన తత్వం
దాచినా దాగని ఆత్మ యొక్క నిజ స్వరూపం

కళ్లు కేవలం చూసే కిటికీలు కానే కావు
కాలం రాసిన కథలకు సజీవ సాక్షులు
హృదయం పలికే ప్రతి సత్యానికి అద్దాలు
చీకటిని దాచలేని కళ్లే ఆత్మకు దీపాలు !!