ସ୍ୱାଗତ ନବବର୍ଷ ସତର
ସ୍ୱାଗତ ନବବର୍ଷ ସତର
ଷୋହଳ ପୁରିକି ସତର ଚାଲିଲା ଏକବିଂଶ ଶତାବ୍ଦୀକୁ
ନହୁଲି ବୟସ ତଥାପି ଯାଇନି ରଂଗରସ ଛାଡିବାକୁ ।
ଓବାମା ଖସିଲେ ଡୋନାଲ୍ଡ ପଶିଲେ ହ୍ୱାଇଟ୍ ହାଉସ୍ ଠାରେ
ଜୟଲଳିତାଙ୍କ ଜୟଗାନ ହେଲା ଶୋଇଲେ ମହାନିଦ୍ରାରେ ।
ରିଓ ଅଲିମ୍ପିକ୍ରେ କନ୍ୟାରତ୍ନ ତିନି ରଖିଲେ ଦେଶର ମାନ
ସର୍ଜିକାଲ୍ ଷ୍ଟ୍ରାଇକ୍ ହୋଇଲା ସଫଳ ଶତ୍ରୁ ମୁଖେ ବୋଳି ଚୁନ ।
ମୋଦି ସାଇଁ ଶେଷେ ବିମୁଦ୍ରିକରଣ ପେଶିଲେ ଅମୋଘ ବାଣ
ନିରିହ ଜନତା ଚକ୍କର କାଟୁଛି ବ୍ୟାଙ୍କର ହଇରାଣ ।
ପଚାଶ ଦିନର କଷଣ କେବେହେଁ ଭୁଲିବେ ନାହିଁ ବ୍ୟାଙ୍କର
ଦୁଇ ଦିନ ଛୁଟି ଲଲିପପ୍ ଭେଟି ଅନୁକଂପା ଦିନ ଚାର ।
ସତର ବେଳକୁ ପତରେ ପତରେ ସରକାର ଚାଲିବାର
ଜି.ଏସ୍.ଟି. ବିଲ୍ ଅପ୍ରେଲ୍ ରୁ ଯେବେ କରିବ କମାଲ୍ ତା'ର ।
କ୍ୟାସ୍ ଲେସ୍ କାରବାର କରିବାକୁ ସରକାର ତରବର
ଫୋର୍ ଜି ଧରି ବାଇଆ ସଭିଏଁ ହାଇସ୍ପିଡ୍ କାରବାର ।
ସ୍ୱଛତା ସପନ ସତ କରିବାକୁ ଆଗଭର ନରେନ୍ଦର
କ୍ଷମତା ଅଳିନ୍ଦେ ଛନ୍ଦି ହୋଇଯାଏ କିକରିବ ଝାଡୁଦାର ।
ସତର ବରଷେ ସ୍ନାତକ ଆରମ୍ଭ ଦେଶ ହେବ ସଚେତନ
ଛାଡି ଷୋହଳର ଉନ୍ମାଦନା ଯେତେ ସ୍ଥିର ହେବ ପରା ମନ ।
ନିଜେ ବଦଳିଲେ ଦେଶ ବଦଳିବ ସଭିଏଁ କରିବା ହେଜ
ସ୍ୱଚ୍ଛ ଭାରତ ଦେଖିବା ପାଇଁକି ଝାଡୁ ଧରି ହେବା ସଜ