ଆଲୁରୁ ବାଲୁରୁ ଗୀତ
ଆଲୁରୁ ବାଲୁରୁ ଗୀତ
ମାଧବ ଚନ୍ଦ୍ର ଦାଶ
ଧାଇଁ ଗିଡ଼ିଗିଡ଼ି ଧାଙ୍ଗିଡ଼ି ,
ସଜ ମଲ୍ଲୀଫୁଲ ଚାଙ୍ଗୁଡ଼ି ,
ଧାଙ୍ଗିଡ଼ି କରିଛି ବେସର ,
ଖାଇବା ବେଳରେ ଜମିଯିବ ଆଜି ,
ତରକାରୀ ଖିଆ ଆସର ।
ସୁନୁ ସୁନୁ ସୁନୁ ସୁନିଆ ,
ଶେଉଳ ଧଇଲା ସନିଆ ,
ବୋଉ ରାନ୍ଧିଲାଣି ତିଅଣ ,
ଶେଉଳ ଝୋଳକୁ ହାପୁଡ଼ି ଖାଇବା ,
ଆଉ ଲୋଡ଼ା ଅବା କ’ଣ ।
କୁତୁ କୁତୁ କୁତୁ କୁତିଆ ,
ଚାଳରେ ବଇଚି ଚଟିଆ ,
ମାଆ ସାଥେ ହୁଏ ଗେଲ ,
ଇଆଡେ ଦେଖରେ ଫୁଲେଇ ହେଇକି ,
ଉଡୁଚି ମାଟିଆ ଚିଲ ।
ଗୁଡୁ ଗୁଡୁ ଗୁଡୁ ଗୁଡିଆ ,
ଗୁଡୁ ପଢେ ପାଠ ବଢିଆ ,
ବୋଉକୁ ଟିକିଏ ଚାହୁଁଚି ,
ବଡ ହେଲେ ହବ ଡାକତର ବୋଲି ,
ଦାନ୍ତକୁ ନେଫାଡି କହୁଚି ।