ବେଲପଣା
ବେଲପଣା
ଡ॰ ସଦାନନ୍ଦ ପରିଡ଼ା
ମାମୁ ଆଣିଦେଲେ ଗାଆଁରୁ ଦୁଇ ପାଚିଲା ବେଲ,
ବୋଇଲେ ବେଲପଣା ପିଅ ପେଟ ରହିବ ଭଲ ।
ନାନୀ କୋରିଦେଲା ବେଲକୁ ମଞ୍ଜି ବାହାର କରି,
ବେଲ ଶସ ସଫା କରିଣ ଦେଲା ଗଞ୍ଜରେ ଭରି ।
ମାଆଙ୍କ ବରାଦେ ଆଣିଲେ ବାପା ପାଣିଆ ଗୁଡ,
ତା’ ସଙ୍ଗେ ପାଚିଲା କଦଳୀ ପାଟକପୁରା ବଡ଼ ।
ଗୋଲମରିଚ ଛେନା ମଧୁ ପୁଣି କଷି ନଡିଆ,
କାଜୁ ଖଣ୍ଡ ଖଣ୍ଡ ପଡିଲା ହେଲା ବଢିଆ ।
ସ୍ଵାଦ ଅନୁସାରେ ମିଶାଇ ଗୋଲମରିଚ ଗୁଣ୍ଡ,
ପକାଇଲେ ଗୁଡ ସାଙ୍ଗରେ କିଛି ନବାତ ଖଣ୍ଡ ।
ଘାଣ୍ଟିଦେଲା ତାକୁ ଡଙ୍କିରେ କିଛି ମିଶାଇ ଛେନା,
ପୁଣି ପକାଇଲା ତହିଁରେ ଗୁଜୁରାତିର ଚୂନା ।
ମାଠିଆରୁ ଆଣି ମିସାଇଦେଲୁ ବିଶୁଦ୍ଧ ଜଳ,
ପଣା ହୋଇଗଲା ତୟାର ମୁଖୁଁ ବହିଲା ଲଳ ।
ଗିଲାସରେ ପଣା ଭରିଣ ଦେଲୁ ନଡିଆକୋରା ,
ଚେରିକୋଳି ଖଣ୍ଡ ସଜାନ୍ତେ ଆହା ! ଦିଶିଲା ତୋରା ।
ଆନନ୍ଦେ ପିଇଲୁ ସଭିଏଁ ସେଇ ବେଲର ପଣା,
ପେଟ ପାଇଁ ଉପକାରୀ ଏ ଏହା ସଭିଙ୍କି ଜଣା ।