ଆସୁଛି ଦଶରା

ବଜା ବଜା ଯୋଡ଼ି ନାଗରା ବଜା

ବଜା ବଜା ଢୋଲ ମହୁରୀ ବଜା

ଦିଗ ଚଉଦିଗ ହୋଇଛି ସଜା

ଆସିଛି ଦଶରା ଦୁର୍ଗା ପୂଜା ।

ଶୁଭ ଶରତରେ ହସେ ଧରଣୀ

ଉଛୁଳେ ଗଗନ ପବନ ପାଣି

ସବୁଜ ସୁନ୍ଦର ସାଗୁଆ ମାଟି

ଫୁଲ ପସରାରେ ରଙ୍ଗ ର ଝୋଟି ।

ମାଆଙ୍କ ପାଇଁକି ଶୋଭା ସୁନ୍ଦର

ନାଲି କଇଁ ଫୁଲ ନାଲି ମନ୍ଦାର

ପୀଠରୁ ମଣ୍ଡପେ ଉଡୁଛି ଧ୍ବଜା

ଆସିଛି ଦଶରା ଦୁର୍ଗା  ପୂଜା ।

ପୂଜା ଉପାସନା ଉପାସ ବ୍ରତ

ମଧୁର ମୂର୍ଚ୍ଛନା ମଙ୍ଗଳ ଗୀତ

ଧୂପ ର ମହକ ଦୀପ ଆଳତି

କରୁଣାମୟୀଙ୍କୁ କୋଟି ପ୍ରଣତି ।

ପାପ ତାପ ସବୁ କରନ୍ତି ଦୂର

ସନ୍ତାନ ବତ୍ସଳା ଭାରି ନିଜର

ଦିଅ ମା ଆଶିଷ ହେ ଦଶଭୂଜା

ଆସିଛି ଦଶରା  ଦୁର୍ଗା ପୂଜା ।