ସମୟର ଗୀତ
ସମୟର ଗୀତ
ଦିନ ସରେ ରାତି ସରେ
ସରି ସରି ଯାଉଥାଏ ଆୟୁଷ ବି ଅଳ୍ପ ଅଳ୍ପ କରି,
ସମୟ କିନ୍ତୁ ସରେନା କେବେ ବି
ସେ ତାର ବହୁଥାଏ ଅନ୍ତହୀନ ସୁଅଟିଏ ଧରି |
ନୂଆ ରୂପ ନିତ୍ୟ ଧରି ଆସେ
ସତେ କେଉଁ ସୁଚିନ୍ତିତ ପ୍ରେରଣାରେ ବ୍ରତୀ,
ଭେଟି ଦିଏ ଭିନ୍ନ ଭିନ୍ନ ଅନୁଭବ ସବୁ
ଜୀବନ ଦର୍ଶନ ପାଇଁ ସେଇ ହିଁ ତ ଏକମାତ୍ର ସାଥୀ |
ସରି ସରି ଯିବାପାଇଁ
ନ ଆସୁ ମନର ତଳେ ନାମହୀନ ଶୋଚନା କି ଗ୍ଳାନି,
ନିଜକୁ ସାରି ଦେବା ହିଁ ଜୀବନର ଲକ୍ଷ୍ୟ
ସେଇଥିରେ ଲେଖାହୁଏ ଜୀବନର ମହାର୍ଘ କାହାଣୀ |
ସମୟର ଏଇ ଗୀତ
ଛୁଇଁଯାଉ ଖୋଲିଦେଇ ହୃଦୟର ଅନ୍ଧାରୀ ଦରଜା
ଜୀବନକୁ ଜୀଇଁବାରେ
ମଗ୍ନ ହୋଇ ପ୍ରତିପ୍ରାଣ ଲୁଟି ନେଉ ବଂଚିବାର ମଜା |